Forseti palestínska Rauða hálfmánans, dr. Younis Al Khatib, er kominn til landsins og byrjaði heimsókn sína á að hitta starfsfólk Rauða krossins á Íslandi í höfuðstöðvum félagsins í Reykjavík.

„Rauði krossinn á Íslandi og palestínski Rauði hálfmáninn tilheyra sömu hreyfingu,“ sagði Sigríður Stefánsdóttir, formaður Rauða krossins, er hún bauð dr. Al Khatib velkominn. „Við deilum sömu grunngildum, þeirra á meðal mannúðinni,“ bætti hún við og hélt áfram: „Hins vegar eru aðstæður okkar og starfsumhverfi gjörólík. Við berum mikla virðingu fyrir starfi ykkar og dáumst að hugrekki ykkar.“

Vernd þeirra sem vinna mannúðarstörf er dr. Al Khatib skiljanlega ofarlega í huga. Þrjátíu starfsmenn og sjálfboðaliðar félagsins hafa verið drepnir við störf sín á Gaza á síðustu þremur árum. „Rauði krossinn á Íslandi veit hvað það þýðir þegar við tölum um mannúð, virðingu og fólk í neyð, eða þegar við tölum um verndun mannúðarstarfsmanna,“ sagði Dr. Al Khatib. „ Við sem tilheyrum hreyfingu Rauða krossins og Rauða hálfmánans höfum lært um þessa hluti í þjálfun okkar, en að upplifa það á eigin skinni er eitthvað sem fær mann svo sannarlega til að gráta. Ég hef grátið mörgum sinnum á síðustu þremur árum þegar kollegar mínir hafa særst eða verið drepnir.“

Grunngildi hreyfingarinnar og lög landa hafa ekki nægt til að vernda mannúðarstarfsmenn. Mannúðarstarfsmenn séu í meiri hættu en áður og oftar skotmörk í vopnuðum átökum. Þá þróun verði að stöðva.

Hádegisfundur í Þjóðminjasafninu

Í hádeginu í dag, fimmtudag, verður dr. Al Khatib með fyrirlestur í sal Þjóðminjasafnsins. Þar mun hann fjalla um stöðu mannúðarmála í Palestínu og þær áskoranir sem einkenna starf palestínska Rauða hálfmánans. Landsnefnd um mannúðarrétt og Alþjóðamálastofnun standa að viðburðinum sem ber yfirskriftina Vernd og mannúð á átakasvæðum: Áskoranir og árangur í starfi palestínska Rauða hálfmánans og hefst hann kl. 12. Fyrirlesturinn er opinn öllum meðan húsrúm leyfir og verður sömuleiðis sendur út í beinu streymi.