Alþjóðastarf
Neyðarsöfnun Rauða krossins á Íslandi vegna jarðskjálfta í Tyrklandi og Sýrlandi
06. febrúar 2023
Rauði krossinn á Íslandi hefur ákveðið að hefja neyðarsöfnun vegna jarðskjálftanna í Tyrklandi og Sýrlandi.

Jarðskjálfti að stærð 7,8 átti sér stað í suðurhluta Tyrklands í nótt og norðurhluta Sýrlands í nótt og öflugir eftirskjálftar hafa fylgt í kjölfarið.
Skjálftarnir hafa kostað mörg mannslíf og valdið mikilli eyðileggingu, bæði í Tyrklandi og nágrannaríkinu Sýrlandi. Á annað þúsund eru þegar látnir í Tyrklandi og Sýrlandi. Óttast er að tölur látinna og slasaðra hækki á næstu klukkustundunum og sólarhringum og að frekari eftirskjálftar verði á svæðinu.
Það mun taka stjórnvöld nokkurn tíma að meta skemmdirnar að fullu, sérstaklega á dreifbýlum svæðum, en margar byggingar hafa skemmst mikið og hundruð húsa hafa hrunið í tyrkneskum og sýrlenskum borgum. Óttast er að fjöldi fólks sitji fast í rústum húsa og miklar skemmdir hafa orðið á innviðum og það torveldar allt hjálparstarf á svæðinu. Einnig hamla erfið veðurskilyrði björgunaraðgerðum en kalt er á svæðinu.
Alþjóðahreyfing Rauða krossins og Rauða hálfmánans er í stöðugu sambandi við Rauða hálfmánann í Tyrklandi og í Sýrlandi og hefur þegar veitt aðstoð og er að undirbúa enn frekari aðstoð, meðal annars á sviði heilbrigðisaðstoðar. Rauði hálfmáninn í Tyrklandi hefur þegar sent á hamfarasvæðin mikið magn mannúðaraðstoðar svo sem neyðarskýli, matvæli og blóðbirgðir til að mæta þörfum þolenda skjálftanna.

Tyrknesk stjórnvöld hafa óskað eftir alþjóðlegri neyðaraðstoð og og tyrkneski Rauði hálfmáninn er að undirbúa opinbera söfnun til að styðja við fórnarlömb jarðskjálftans. Sýrlenski Rauði hálfmáninn hefur einnig óskað eftir fjárhagsstuðningi úr neyðarsjóðum alþjóðasambands Rauða krossins.
Til að bregðast við brýnni þörf fyrir mannúðaraðstoð á svæðinu hefur Rauði krossinn á Íslandi þegar hafið neyðarsöfnun og biðlar til almennings að leggja söfnuninni lið og styðja við lífbjargandi hjálparstarf í Tyrklandi og Sýrlandi. Hægt er að leggja söfnuninni lið með því að leggja inn á reikning Rauða krossins númer 0342-26-12, kt. 530269-2649 og með því að senda SMS-ið HJALP í síma 1900 og styðja söfnunina um 2.900 kr. Einnig er hægt að styrkja söfnunina í gegnum Aur/ Kass: raudikrossinn
Atli Viðar Thorstensen, sviðsstjóri alþjóðasviðs Rauða krossins á Íslandi, segir að verið sé að kanna hvort þörf verði á að senda sendifulltrúa frá Rauða krossinum á vettvang og að það komi í ljós fljótlega, en Rauði krossinn á Íslandi hefur stutt við flóttafólk í Tyrklandi með aðstoð utanríkisráðuneytisins og Mannvina Rauða krossins um árabil og sömuleiðis veitt mikilvæga mannúðaraðstoð í Sýrlandi.
„Sé þörf á okkar fólki mun það ekki láta sitt eftir liggja til að koma til móts við þolendur skjálftanna í Tyrklandi og Sýrlandi. En okkar framlög og stuðningur veltur á stuðningi almennings og stjórnvalda og því köllum við eftir fjárstuðningi svo hægt sé að bregðast við hratt við brýnni neyð á svæðinu. Á skjálftasvæðunum í Tyrklandi er auk heimamanna mikill fjöldi sýrlenskra flóttamanna og því margir sem koma til með að treysta á utanaðkomandi aðstoð, sérstaklega fyrstu sólarhringana eftir þessar hamfarir,“ segir hann.
--
Hvernig veitir þú stuðning?
Smellið hér til að leggja neyðarsöfnuninni lið https://www.raudikrossinn.is/styrkja/stakur-styrkur/
Sendu SMS-ið HJALP í síma 1900 til að styðja söfnunina um 2.900 kr
Leggðu inn með Aur/Kass: raudikrossinn
Leggðu inn á reikning Rauða krossins: 0342-26-12, kt. 530269-2649
--
Rauði krossinn á Íslandi tilheyrir allri þjóðinni, en án stuðning hennar getur félagið ekki sinnt þeim fjölmörgu mikilvægu verkefnum sem það stendur fyrir, samfélaginu til góðs. Hjálpaðu okkur að hjálpa öðrum með því að gerast Mannvinur.
Fréttir af starfinu
Fréttayfirlit
Stjórnvöld fordæmi brot á mannúðarlögum hátt og skýrt
Alþjóðastarf 26. ágúst 2025„Það er mikilvægt að stjórnvöld alls staðar, líka í litlum, friðsælum ríkjum eins og Íslandi, leggi áherslu á virðingu fyrir alþjóðlegum mannúðarlögum og fordæmi hátt og skýrt þegar þau eru brotin,“ sagði Gísli Rafn Ólafsson, framkvæmdastjóri Rauða krossins, í viðtali á Morgunvaktinni á Rás 1 um stöðu mannúðaraðstoðar í heiminum.

Ókeypis vefnámskeið í sálrænni fyrstu hjálp
Almennar fréttir 25. ágúst 2025Rauði krossinn býður nú upp á vefnámskeið um sálræna fyrstu hjálp á íslensku. Allir sem vilja vera til staðar fyrir aðra þegar á reynir geta nýtt sér námskeiðið.

Ylja neyslurými Rauða krossins er 1 árs
Innanlandsstarf 12. ágúst 2025Á fyrsta starfsári sínu hefur Ylja sýnt fram á þörf fyrir öruggt neyslurými, þar sem notendur upplifa virðingu, öryggi og væntumþykju í stað útskúfunar og hættu. Traust notenda til þjónustunnar hefur byggst hratt upp vegna góðra tengsla milli notenda, starfsfólks Ylju og samstarfsaðila og lagt grunn að árangursríkri þjónustu.