Alþjóðastarf
Öflugt hjálparstarf í Marokkó en framtíðin ótrygg
29. september 2023
Rauði hálfmáninn í Marokkó hefur náð miklum árangri í hjálparstarfi sínu vegna jarðskjálftans sem varð þar fyrir þremur vikum, en það er mikil þörf á langtíma stuðningi á svæðunum sem urðu verst úti.
Rauði hálfmáninn í Marokkó, í samstarfi við þarlend stjórnvöld, hefur unnið hörðum höndum að því að mæta neyð þolenda jarðskjálftans sem varð þar 8. september síðastliðinn og olli miklu mannfalli og gríðarlegri eyðileggingu. En nú, þremur vikum eftir skjálftann, er enn mikið verk fyrir höndum.
Um 50 þúsund fjölskyldur misstu heimili sín í jarðskjálftanum og þetta fólk skortir enn langtímalausnir á húsnæðisvanda sínum. Von er á rigningu á svæðinu sem varð verst úti í skjálftanum og hætta er á að hún valdi skriðuföllum. Á þessu fjöllótta svæði er mikið af stórum hnullungum sem óttast er að gætu farið af stað og valdið frekari eyðileggingu. Auk þess er enn hætta á eftirskjálftum.
Sem stendur eru mörg hundruð sjálfboðaliðar Rauða hálfmánans í Marokkó að störfum í fjórum héruðum sem komu illa út úr skjálftanum; Taroudant, Marrakech, Chichawa og Al Haouz. Bílalestir hafa ferðast til afskekktustu þorpanna og veitt heilbrigðisþjónustu, lyf og sálrænan stuðning og sjálfboðaliðar Rauða hálfmánans hafa gefið mikið af blóði.
Mikilvægt að tryggja langtíma stuðning
Alþjóðasamband Rauða krossins hefur óskað eftir 100 milljónum svissneskra franka (rúmlega 15 milljörðum íslenskra króna) til að hjálpa til við að fjármagna þetta neyðarviðbragð Rauða hálfmánans.
Þökk sé ótrúlegri samstöðu marokkósku þjóðarinnar hefur tekist að sinna grunnþörfum fólks á þeim svæðum sem komu illa út úr skjálftanum. En það er mikilvægt að tryggja að þessu verði sinnt til langframa, því svæðin sem urðu illa úti koma til með að þurfa stuðning næstu árin.
Nú er mest áríðandi að tryggja þeim sem hafa misst heimili sín hreint drykkjarvatn, hreinlætisaðstöðu, eldhúsáhöld, öruggt og hlýtt húsaskjól og aðrar nauðsynjar fyrir veturinn. Mikið af svæðinu sem varð illa úti er í 1500-2000 metra hæð yfir sjávarmáli og hitastigið er farið að lækka, sérstaklega á nóttunni.
Hægt er að styrkja neyðarsöfnun Rauða krossins á Íslandi vegna hamfaranna í Marokkó og Líbíu með eftirfarandi leiðum:
SMS: Senda HJALP í símanúmerið 1900 (2.900 kr.) (Síminn og Nova)
Hringja í númerið 904-2500 fyrir 2.500 kr. styrk
Aur: @raudikrossinn eða 1235704000
Kass: raudikrossinn eða 7783609
Söfnunarreikningur Rauða krossins: 0342-26-12, kt. 530269-2649
Fréttir af starfinu
Fréttayfirlit
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.
Kristín S. Hjálmtýsdóttir lætur af störfum sem framkvæmdastjóri Rauða krossins á Íslandi
Almennar fréttir 02. desember 2024Stjórn Rauða krossins á Íslandi og Kristín S. Hjálmtýsdóttir, framkvæmdastjóri félagsins síðastliðin 9 ár, hafa gert samkomulag um starfslok hennar. Viðræður um starfslokin áttu sér stað að frumkvæði Kristínar, sem hefur nú þegar látið af störfum. Arna Harðardóttir sem gengt hefur starfi fjármálastjóra mun taka við verkefnum framkvæmdastjóra samhliða sínum störfum þar til nýr framkvæmdastjóri hefur verið ráðinn. Staðan verður auglýst innan skamms.