Alþjóðastarf
Rauði krossinn á Íslandi styrkir mannúðaraðstoð á Gaza
20. desember 2023
Rauði krossinn á Íslandi hefur sent 75 milljónir króna til að styrkja mannúðaraðstoð Alþjóðaráðs Rauða krossins og palestínska Rauða hálfmánans á Gaza.
Rauði krossinn á Íslandi styður mannúðaraðstoð Alþjóðaráðs Rauða krossins og palestínska Rauða hálfmánans um 75 miljónir króna með aðstoð utanríkisráðuneytisins, Mannvina Rauða krossins og allra þeirra sem studdu neyðarsöfnun Rauða krossins.
Átökin bitna á almennum borgurum
Almennir borgarar bera hitann og þungann af yfirstandi átökum á Gaza. Mikilvægir innviðir og heilu íbúðahverfin hafa verið lögð í rúst. Tölur herma að hátt í 53 þúsund almennir borgarar hafi særst og 20 þúsund hafi látið lífið, þar af yfir fimm þúsund konur og hátt í átta þúsund börn. Um 85% íbúa Gaza eru á vergangi, eða um 1,9 milljón einstaklingar, og um 60% heimila hafa verið eyðilögð eða orðið fyrir skemmdum.
Íbúar Gaza hafa ekki reglulegan aðgang að mat, vatni og öðrum lífsnauðsynjum þar sem matvælaframleiðsla hefur stöðvast.Talið er að um helmingur íbúa Gaza svelti og að 90% þeirra séu reglulega án matar í heilan dag. Aðeins tíu prósent af þeim mat sem nú þarf fyrir 2,2 milljónir einstaklinga hafa komist inn á Gaza síðustu 70 daga. Mikilvægir innviðir eins og rafmagns- og vatnsveitur hafa verið lagðir í rúst. Aðgengi að heilbrigðisaðstoð er mjög takmarkað því sjúkrahús hafa sætt árásum og eru að stórum hluta óstarfhæf. Þúsundir fjölskyldna eru enn án sambands eða frétta af ættingjum sem hafa horfið og mikill fjöldi fólks hefur ekki getað endurheimt líkamsleifar látinna ættingja sinna.
Aðstoða íbúa Gaza gegnum gríðarlega erfiðleika
Alþjóðaráð Rauða krossins hefur sinnt mikilvægu mannúðarstarfi á Gaza í samvinnu við palestínska Rauða hálfmánann síðan árið 1967. Þessir aðilar aðstoða íbúa Gaza í yfirstandandi átökum, meðal annars við aðgang að matvælum, vatni, rafmagni, hreinlætisvörum og heilbrigðisþjónustu.
Þrátt fyrir gríðarlega erfitt ástand vinnur Alþjóðaráð Rauða krossins og starfsfólk og sjálfboðaliðar palestínska Rauða hálfmánans hörðum höndum að því að koma hjálpargögnum til íbúa svæðisins sem og að veita börnum og fullorðnum sálrænan stuðning. Starfsfólk og sjálfboðaliðar hreyfingarinnar hafa sýnt undraverðan dug og þor og gera allt sem í þeirra valdi stendur til að lina þjáningar fólks í óboðlegum aðstæðum.
Rauði krossinn þakkar öllum þeim sem studdu neyðarsöfnunina kærlega fyrir sitt framlag. Stuðningurinn mun nýtast vel til að mæta þeim miklu erfiðleikum sem íbúar Gaza standa frammi fyrir.
Fréttir af starfinu
FréttayfirlitVilt þú verða leiðbeinandi í skyndihjálp?
Almennar fréttir 14. október 2024Rauði krossinn á Íslandi stendur fyrir leiðbeinendanámskeiði í Skyndihjálp dagana 5. - 8. mars 2025.
Opnuðu litlu Melabúðina til styrktar börnum á Gaza
Almennar fréttir 11. október 2024Vinkonurnar Matthildur Atladóttir, Laufey Hrefna Theodórsdóttir, Halldóra Guðrún Johnson og Anna Jakobína Hjaltadóttir stofnuðu litla búð fyrir utan Melabúðina og seldu alls kyns hluti til styrktar börnum á Gaza.
Stofnuðu fyrirtæki til að hjálpa heimilislausum og styrktu Rauða krossinn
Almennar fréttir 10. október 2024Þrír nemendur í Menntaskólanum á Ísafirði stofnuðu nýlega fyrirtæki til að styrkja heimilislaust fólk á Íslandi og gáfu Rauða krossinum veglegan styrk.