Alþjóðastarf
Sendifulltrúi að störfum í Belís
02. febrúar 2021
Áshildur Linnet er að störfum í Belís eftir að tveir fellibylir fóru yfir landið á síðasta ári.
Í byrjun janúar hélt Áshildur Linnet, sendifulltrúi Rauða krossins á Íslandi, til Belís og vinnur þar að hjálparstarfi á vegum Alþjóðasambands Rauða krossins og Rauða hálfmánans (IFRC) í samstarfi við Rauða krossinn í Belís og með stuðningi utanríkisráðuneytisins.
Í nóvember sl. fóru fellibyljirnir Eta og Iota yfir Mið-Ameríku og ollu töluverðu tjóni í Níkaragúa, Hondúras, Gvatemala og Belís. Allt frá þeim tíma hefur verið unnið að hjálparstarfi vegna náttúruhamfaranna á sama tíma og glímt er við heimsfaraldur. Í Belís urðu gríðarleg flóð svo byggðir víða í landinu fóru á kaf. Í upphafi dvöldust íbúar flóðasvæðanna í neyðarskýlum en hafa nú flestir snúið aftur til síns heima. Mikið uppbyggingarstarf er fyrir höndum, víða hefur orðið mikið tjón á húsnæði og eigur fólks skoluðust í burtu með flóðvatninu. Belís er mikið ferðamannaland og hefur COVID-19 því valdið miklu og útbreiddu atvinnuleysi.
„Fólk sem áður hefði sjálft getað tekist á við eftirköst flóða stóð uppi allslaust og hefur þurft á aðstoð að halda“ segir Áshildur. „Mataraðstoð var veitt fyrir jól og þessa dagana er verið að dreifa hjálpargögnum til að hefja uppbyggingarstarf. Um er að ræða annars vegar fjárhagsaðstoð til viðgerða á húsnæði og kaupum á nýju útsæði fyrir matvælaræktun og hins vegar matarpakka, verkfæri og ýmiskonar búsáhöld. Dreifingin hefur gengið vel þó að miklar rigningar og útgöngubann á kvöldin og nóttunni hafi stundum sett strik í reikninginn. “ segir Áshildur. „Fólk er einstaklega kurteist og þolinmótt við úthlutanir og bíður rólegt eftir að röðin komi að þeim. Við höfum reynt að taka tillit til þarfa á hverju svæði og dreift debetkortum á þeim svæðum þar sem styttra er í hraðbanka en mat og varningi á afskekktari stöðum. Allt eftir óskum íbúanna. Mitt hlutverk er fyrst og fremst að hlusta á fólk, skapa vettvang fyrir þau til að segja sitt álit og greina frá sínum raunverulegu þörfum og reyna að bregðast við eftir bestu getu. Þá höfum við þurft að kenna mörgum hvernig á að nota hraðbanka, einkum eldra fólkinu“.
Áætlað er að ljúka verkefninu í Belís um næstu mánaðarmót en viðbúið er að önnur eins flóð verði að ári, þar sem fellibyljir við Karíbahafið koma reglulega og þeim fylgja mikil flóð. Í Belís eru miklar byggðir bæði niðri við ströndina en einnig við ár og flóðahætta því töluverð. Lítið annað er hægt að gera en vera viðbúin, hafa til vistir og skilgreina rýmingarsvæði hátt uppi í landinu.
Fréttir af starfinu
FréttayfirlitAðalfundur Hafnafjarðar, Garðabæjar og Kópavogsdeildar
Almennar fréttir 14. mars 2024Aðalfundur Hafnafjarðar, Garðabæjar og Kópavogsdeildar var haldin í gær 13.mars og gekk fundur einkar vel. Það var fámennt á fundi en góðmennt og góðar umræður mynduðust um mikilvæg málefni sem snerta verkefni deildar og Rauða krossins í heild sinni.
Neyðarsöfnun fyrir Grindvíkinga lokið
Innanlandsstarf 12. mars 2024Rauði krossinn hefur lokið neyðarsöfnuninni fyrir íbúa Grindavíkur. Hægt er að sækja um fjárstuðning til 19. mars og síðasta úthlutun úr söfnuninni fer fram þann 20. mars. Alls hefur rúmlega 51 milljón kr. safnast.
Framúrskarandi sjálfboðaliðar heiðraðir
Innanlandsstarf 11. mars 2024Höfuðborgardeild Rauða krossins heiðraði þrjá sjálfboðaliða fyrir framúrskarandi framlag innan fjölbreyttra verkefna deildarinnar á aðalfundi sínum í síðustu viku.