Alþjóðastarf
Sendifulltrúi til starfa á Haítí
31. ágúst 2021
Ágústa Hjördís Kristinsdóttir, sendifulltrúi Rauða krossins, heldur í dag af stað til Haítí þar sem hún mun starfa í neyðarteymi alþjóðaráðs Rauða krossins í kjölfar jarðskjálftans sem reið þar yfir fyrr í mánuðinum. Þetta er þriðja sendiför Ágústu Hjördísar.
Ágústa Hjördís Kristinsdóttir, sendifulltrúi Rauða krossins, heldur í dag af stað til Haítí þar sem hún mun starfa í neyðarteymi alþjóðaráðs Rauða krossins (IFRC Rapid Response Team) í kjölfar jarðskjálftans sem reið þar yfir fyrr í mánuðinum. Starf Ágústu Hjördísar mun felast í að huga að heilsu og öryggi þess starfsfólks sem sinnir hjálparstörfum á Haíti en gert er ráð fyrir að dvöl hennar standi í að minnsta kosti einn mánuð.
Ágústa Hjördís lauk prófi í hjúkrunarfræði frá Háskóla Íslands og hlaut sérþjálfun í bráðahjúkrun á Landspítalanum. Þá er hún með meistaragráðu í bráðahjúkrun frá University of California í San Francisco og hefur lokið diplómanámi í þróunarfræðum frá Háskóla Íslands. Ágústa Hjördís lauk IMPACT sendifulltrúanámskeiði Rauða krossins árið 2012 og hefur síðan þá farið í tvær sendiferðir. Fyrri ferðin var til Nepal árið 2015 þar sem hún starfaði á vettvangssjúkrahúsi og tveimur árum síðar starfaði hún svo í tjaldsjúkrahúsi í Cox Bazar í Bangladess.
„Ferðin leggst vel í mig og þótt fyrirvarinn sé skammur hefur undirbúningurinn gengið hratt og vel. Verkefni sendifulltrúa eru spennandi og gefandi en auðvitað ekki síst krefjandi enda aðstæður oft erfiðar,“ segir Ágústa Hjördís og bætir við: „En svo eru auðvitað engar tvær sendiferðir eins og erfitt að spá fyrir um það sem koma skal svo þetta er svolítið spurning um að taka því sem að höndum ber og gera sitt besta hverju sinni.“
Rauði krossinn óskar Ágústu Hjördísi góðrar ferðar og góðs gengis í þeim krefjandi verkefnum sem framundan eru.
Ágústa Hjördís í Nepal árið 2015.
Fréttir af starfinu
FréttayfirlitÖflug skaðaminnkun en þörfin eykst stöðugt
Innanlandsstarf 22. apríl 2024Rauði krossinn opnar neyslurými á ný innan skamms. Þessi árangur næst í kjölfar öflugrar og árangursríkrar vinnu í þágu skaðaminnkunar hjá félaginu, en Hafrún Elísa Sigurðardóttir, teymisstýra í skaðaminnkun, segir að þörfin sé sífellt að aukast.
Rio Tinto styrkir Rauða krossinn um 208 milljónir vegna jarðhræringa við Grindavík
Innanlandsstarf 18. apríl 2024Rio Tinto hefur veitt Rauða krossinum á Íslandi styrk að upphæð 208 milljónir króna, eða jafnvirði 1,5 milljónum dollara, til stuðnings samfélagsins sem hefur orðið fyrir áhrifum jarðskjálfta og eldgosa í og við Grindavík. Um er að ræða hæsta styrk sem fyrirtæki hefur veitt Rauða krossinum á Íslandi til verkefna innanlands.
Nýtt neyslurými opnað í Borgartúni: Stórt skref í skaðaminnkun
Almennar fréttir 12. apríl 2024Eftir langa bið er loksins að koma upp nýtt neyslurými sem staðsett verður í Borgartúni.