Skrifstofa Alþjóðaráðs Rauða krossins (ICRC) í Rafah varð í dag, mánudag, fyrir skemmdum af völdum sprengiflauga. Þetta gerist þrátt fyrir að skrifstofurnar séu greinilega merktar og staðsetning þeirra tilkynnt öllum aðilum. Sem betur fer slasaðist enginn starfsmaður en atburðurinn mun engu að síður hafa bein áhrif á getu ICRC til að starfa á Gaza. Í yfirlýsingu fordæmir ICRC árásina á húsnæði sitt harðlega.

Hundruð almennra borgara hafa látist í átökum á Gaza undanfarna viku. Vegna útbreiddra átaka og fyrirskipana um rýmingar hefur fólk orðið að flýja án þess að hafa til öruggra svæða að venda. Að sögn ICRC hafa margir neyðst til að skilja tjöld sín og aðrar eigur eftir á flóttanum. Birgðir af mat og vatni eru orðnar af skornum skammti.

„Átök á ný og ofbeldi fylla alla vonleysi,“ segir í yfirlýsingu ICRC. Í gær hafi tapast samband við bráðatækna palestínska Rauða hálfmánans og ekki vitað hvar þeir eru niðurkomnir. Í síðustu viku voru hjálparstarfsmenn drepnir á Gaza.

Samkvæmt alþjóðlegum mannúðarlögum skal hjálparstarfsfólk, heilbrigðisstarfsfólk og heilbrigðisstofnanir njóta sérstakrar verndar. „Þessa aðila ber að virða og vernda í öllum aðstæðum svo tryggja megi samfellu í mannúðaraðstoð,“ segir í yfirlýsingu Alþjóðaráðs Rauða krossins. Allir verði að leggjast á eitt til að tryggja öryggi þeirra sem veita slíka aðstoð.