Almennar fréttir

Ljóst er að mjög alvarlegt ástand hefur skapast fyrir íbúa Úkraínu og fyrirséð að neyð almenna borgara mun aukast dag frá degi. Alþjóða Rauði krossinn undirbýr nú eina umfangsmestu aðgerðir í Evrópu frá lokum síðari heimstyrjaldarinnar þar sem allt kapp er lagt á að koma nauðsynlegri mannúðaraðstoð til íbúa Úkraínu og þeirra þúsunda sem eru á flótta vegna átakanna.

Víða í Úkraínu eru bardagar háðir á götum úti, hundruð þúsundir íbúa hafa lagt á flótta og búist er við að um fimm milljónir fólks muni flýja og mikill meirihluti yfir landamærin til Póllands. Rauði krossinn hefur nú þegar opnað fjölda móttökustöðva á landamærum í Póllandi og fleiri löndum sem eiga landamæri að Úkraínu þar sem er veitt heilbrigðisþjónusta og neyðaraðstoð.

Það er mjög erfitt fyrir íbúa að nálgast nauðsynjar í Úkraínu. Mikið af fólki dvelur í neðanjarðarbyrgjum og erfitt er að nálgast áreiðanlegar upplýsingar um ástandið á mörgum landsvæðum í landinu. Úkraínski Rauði krossinn fær mikið af neyðarbeiðnum frá íbúum í bráðum vanda. Allt kapp er lagt á að koma matarpökkum, vatni og öðrum nauðsynjum til fólks, auk þess að styðja við heilbrigðisstofnanir í landinu.

Rauði krossinn hefur þungar áhyggjur af brotum á alþjóða mannúðarlögum í þessum átökum. Samkvæmt þeim lögum njóta almennir borgarar griða sem og borgaralegir innviðir á borð við vatns- og rafmagnsveitur sem ekki tengjast hernaði á nokkurn hátt. Stríðandi fylkingum er skylt að gæta meðalhófs í hernaðaraðgerðum sínum og hlífa verður óbreyttum borgurum og innviðum sem tryggja að nauðsynleg þjónusta sé veitt íbúum.

Fjöldi landsfélaga Rauða krossins í Evrópu hefur hafið söfnun og er væntanleg neyðarbeiðni frá alþjóða Rauði krossinn vegna umfangsmikilla aðgerða sem er fyrirhuguð.

Kristín S. Hjálmtýsdóttir framkvæmdastjóri Rauða krossins á Íslandi vill þakka almenningi og Mannvinum Rauða krossins kærlega fyrir þennan mikilvæga stuðning. “Allt fé sem safnast verður varið til að koma til móts við íbúa Úkraínu, til að koma nauðsynjavörum til íbúa og sjúkrastofnanna og tryggja aðgang að matvælum, vatni, hreinlætisvörum og nauðsynlegum lækningabúnaði fyrir særða” segir Kristín.

Rauði krossinn minnir á að Hjálparsíminn 1717 og netspjallið 1717.is er alltaf opinn. Hægt er að hafa samband vegna til að sálrænan stuðning, ráðgjöf og hlustun.

Neyðarsöfnun Rauða krossins mun halda áfram næstu daga.

Hægt er að veita nauðsynlega mannúðaraðstoð til íbúa í Úkraínu með eftirtöldum leiðum:

• SMS: Senda HJALP í símanúmerið 1900 (2.900 kr.)
• Aur: @raudikrossinn eða 1235704000
• Kass: raudikrossinn eða 7783609
• Söfnunarreikningur Rauða krossins: 0342-26-12, kt. 530269-2649