Þrjár ályktanir um mikilvæg samfélagsleg mál voru samþykktar á aðalfundi Rauða krossins sem fram fór í Reykjavík 9. maí. Ein ályktunin lýtur að fjármögnun almannavarna og hinar tvær tengjast málsvarastarfi sem félagið gegnir gagnvart viðkvæmum hópum.

Ályktun aðalfundar um fjármögnun almannavarna:

Aðalfundur Rauða krossins á Íslandi beinir því til stjórnvalda að þau stígi markviss skref í átt að því að rekstrarumhverfi hjálparliðs sem sinnir lögbundnu hlutverki almannavarna, þ.e. Rauða krossins á Íslandi og Slysavarnafélagsins Landsbjargar, verði bætt, svo áfallaþoli þjóðarinnar gagnvart náttúruvá og öðrum ógnum verði ekki stefnt í hættu.

Greinargerð:

Rauði krossinn á Íslandi og Slysavarnafélagið Landsbjörg hafa verið burðarásar í skipulagi almannavarna á Íslandi frá því um miðjan áttunda áratug síðustu aldar. Félögin hafa nýtt eigin fjáröflunarleiðir til að fjármagna öflun og þjálfun sjálfboðaliða, viðbúnað og viðbrögð um allt land. Með lækkandi tekjum, sem skýrist m.a. af sífellt versnandi samkeppnisstöðu sameiginlegs fjáröflunarfyrirtækis félaganna, Íslandsspila, reynist félögunum þyngra um vik að standa við skyldur sínar á þessu sviði.

Við blasir hallarekstur og fyrirsjáanlegur niðurskurður.

Ályktun aðalfundar um brottfararstöð:

Aðalfundur Rauða krossins á Íslandi skorar á stjórnvöld að hverfa frá áformum um að svipta börn og fjölskyldur þeirra sem hingað hafa flúið frelsi í brottfararstöð.

Greinargerð:

Aðalfundur Rauða krossins minnir á að hvers konar mismunun, ekki síst þegar börn eiga í hlut, er skaðleg. Frelsissvipting af þeim toga sem áformuð er í brottfararstöðvum er skaðleg einstaklingum, sérstaklega börnum.

Rauði krossinn stendur ávallt með þeim sem minnst mega sín á hverjum tíma. Börn á flótta eru einn viðkvæmasti hópur samtímans. Rauði krossinn skorar á stjórnvöld að láta af þeim áformum sínum að svipta þessi börn frelsi með einum eða öðrum hætti og nýta fremur vægari úrræði sem gagnreynd hafa verið annars staðar.

Aldrei ætti að vista börn í lokuðu varðhaldi og er það skýlaus krafa skv. stefnu og yfirlýsingum Flóttamannastofnunar, hvorki um lengri né skemmri tíma. Ekki er gert ráð fyrir að afstaða barns sem hefur aldur til sé alltaf tekin til skoðunar af þeim sem ákveður varðhald þess. Fram kemur að leitast er við að varðhald barna sé eins stutt og mögulegt er, en Rauði krossinn telur alvarlegt að barn sé gert ábyrgt fyrir ákvörðunum foreldra sinna.

Ályktun aðalfundar um andúð í garð ákveðinna hópa:

Rauði krossinn skorar á landsmenn alla og stjórnmálafólk sérstaklega að vera ávallt með mannúðinni í liði, sýna öllum samborgurum fulla virðingu og samkennd og fagna fjölbreytileikanum.

Greinargerð:

Andúð í garð ákveðinna hópa hefur risið eins og alda yfir samfélagið síðustu misseri. Hatursorðræðan er þegar tekin að skella á einstaka manneskjum og valda skaða. Börn og fullorðnir af erlendum uppruna finna fyrir neikvæðara viðhorfi í sinn garð. Hinsegin fólk finnur fyrir því sama. Margar konur sömuleiðis. Vegið er að réttindum sem jafna stöðu fólks sem tók áratugi að ná.

Rauði krossinn starfar um allan heim samkvæmt sömu grunngildum: Mannúð, óhlutdrægni og hlutleysi eru þar efst á blaði. Öll eiga rétt á að lifa með reisn, úr hvaða aðstæðum sem þau koma.

Orð eru öflug verkfæri – og þau eru til alls fyrst. Það skiptir máli hvernig við tjáum okkur. Með óvægnari orðræðu fólks í valdastöðum í samfélaginu færast mörkin til og afleiðingarnar bitna harðar á manneskjunum sem í hlut eiga.

Aðalfundur Rauða krossins hvetur stjórnmálafólk og landsmenn alla til að tala um fólk af virðingu og vera ávallt með mannúðinni í liði. Því háværari sem hatursorðræðan er því meiri þörf er á að skrúfa upp í mannúðinni og náungakærleikanum. Það getum við gert með því að skapa mótvægi við hatursfulla orðræðu með jákvæðni og umburðarlyndi í garð samborgara okkar og einnig með því að gefa tíma okkar til sjálfboðastarfa. Þannig sköpum við opið og friðsælt samfélag – okkur öllum til góðs.