Almennar fréttir
Framúrskarandi sjálfboðaliðar
15. mars 2023
Sjálfboðaliðarnir Monika Emilsdóttir og Ragnar Kjartansson fengu viðurkenninguna Framúrskarandi sjálfboðaliðar á nýliðnum aðalfundi Rauða krossins á höfuðborgarsvæðinu þann 9. mars.

Monika Emilsdóttir er læknir og tekur að sér bakvaktir fyrir skaðaminnkunarverkefnið Frú Ragnheiður og hefur gert slíkt í tæp fimm ár. Ragnar Kjartansson, listamaður, starfar í félagstarfi með hælisleitendum síðastliðin tvö ár.
Í umsögn stjórnar um störf Moniku kemur fram að hún er gríðarlega áreiðanlegur sjálfboðaliði og er ötul við að skrá sig á vaktir. Oftast tekur hún tvær vikur á bakvakt í hverjum mánuði. Hún þekkir skjólstæðingahópinn og þjónustu þarfi hans vel. Auk þess er Monika mikilvægur sjálfboðaliði því hún er einnig góður stuðningur fyrir starfsfólk verkefnisins þegar verið er að þjónusta skjólstæðinga Frú Ragnheiðar á daginn, en þá veitir hún læknisfræðilega ráðgjöf og fræðslu og sinnir eftirfylgd mála.
Í umsögn stjórnar um störf Ragnars kemur fram að hæfni hans í mannlegum samskiptum nýtist vel við að brúa bil tungumála og menningarheima í hinu daglegu samskiptum. Hann á mikinn þátt í að viðhalda því hlýlega og jákvæða andrúmslofti sem þar ríkir. Ragnar fer gjarnan út fyrir sínar grunnskyldur sem sjálfboðaliði og nýtir sér tengingar í listaheiminn til að bjóða tónlistarfólki í heimsókn í Rauða krossins auk þess að skipuleggja hópaferðir á listasöfn og vinnustofur listafólks.
Við þökkum þeim Moniku og Ragnari kærlega fyrir þeirra framlag í þágu mannúðar. Hægt er að lesa frekar um starf deildarinnar í ársskýrslu deildarinnar.
Fréttir af starfinu
Fréttayfirlit
20 milljónir til Malaví vegna fellibylsins Freddy
Alþjóðastarf 24. mars 2023Rauði krossinn á Íslandi er að senda 20 milljón króna fjárstuðning til Malaví til að styðja við neyðarviðbragðið eftir að fellibylurinn Freddy olli gríðarlegu tjóni í suðurhluta landsins fyrr í mánuðinum.

Aðalfundur Hafnarfjarðar-, Garðabæjar- og Kópavogsdeildar
Almennar fréttir 24. mars 2023Aðalfundur Hafnarfjarðar-, Garðabæjar- og Kópavogsdeildar var haldinn 9. mars og gekk afar vel. Ný stjórn deildarinnar þakkar fráfarandi stjórn kærlega fyrir sitt framlag til félagsins og hlakkar til að takast á við þau verkefni sem fyrir liggja.

Söfnuðu 50 þúsund fyrir Rauða krossinn
Almennar fréttir 17. mars 2023Tvær stelpur söfnuðu fé fyrir Rauða krossinn með kaffi- og kleinusölu í Langholtsskóla.