Almennar fréttir
Greiðsluseðlar vegna sjúkraflutninga eingöngu rafrænir
28. nóvember 2025
Sjúkrabílasjóður hefur sent út um 25-30 þúsund greiðsluseðla á ári. „Með því að senda þá aðeins út rafrænt sparast að minnsta kosti átta milljónir króna í prentun og sendingarkostnað,“ segir Sara Sturludóttir, aðalbókari Rauða krossins.
Sjúkrabílasjóður Rauða krossins hefur nú hætt að prenta út og senda greiðsluseðla til þeirra sem hafa þurft að nýta sér þjónustu sjúkrabíla. Héðan í frá munu greiðsluseðlarnir eingöngu birtast rafrænt í heimabanka viðkomandi og þar mun einnig birtast krafa til greiðslu.
Rauði krossinn á Íslandi heldur utan um sjúkrabílaflota landsins samkvæmt samningi við Sjúkratryggingar Íslands. Í því felst að Rauði krossinn útvegar og annast innkaup á sjúkrabílum auk þess að reka bifreiðarnar og tækjabúnað til sjúkraflutninga.
„Með þessari breytingu vonumst við til að flýta fyrir afhendingu gagna og bæta þannig þjónustuna við notendur sjúkrabílanna,“ segir Sara Sturludóttir, aðalbókari Rauða krossins á Íslandi. „Við viljum auðvitað einnig gera okkar í þágu umhverfisins með því að minnka pappírsnotkun.“
Sjúkrabílasjóður hefur sent út um 25-30 þúsund greiðsluseðla á ári. „Með því að senda þá aðeins út rafrænt sparast að minnsta kosti átta milljónir króna í prentun og sendingarkostnað,“ segir Sara. „Þetta framtak mun því renna styrkari stoðum undir rekstur sjúkrabílanna til framtíðar.“
Hér getur þú kynnt þér betur rekstur sjúkrabílanna og séð verðskrá.
Ef þú ert með einhverjar spurningar varðandi hið nýja fyrirkomulag greiðsluseðla hvetjum við þig til að hringja í Rauða krossinn í síma 570-4000.
Fréttir af starfinu
Fréttayfirlit
Bökuðu 470 smákökur til styrktar Rauða krossinum
Almennar fréttir 24. apríl 2026Fjögur bekkjarsystkin úr 4. bekk í Barnaskóla Kársness lögðu eldhús heima hjá einu þeirra undir sig um helgina og bökuðu hvorki fleiri né færri en 470 kexkökur sem þau svo seldu til styrktar Rauða krossinum. „Fyrir börn sem þurfa hjálp,“ segja þau.
Að upplifa þakklætið gefur svo gott í hjartað
Innanlandsstarf 20. apríl 2026Framlag Sigríðar Birnu Sigvaldadóttur til verkefna Rauða krossins með fólki í afplánun „hefur skilað sér í raunverulegri breytingu fyrir marga,“ segir í rökstuðningi stjórnar höfuðborgardeildar Rauða krossins sem hefur valið hana einn af sjálfboðaliðum ársins. „Það er gott að geta haft jákvæð áhrif á líf annarra,“ segir Sigríður.
Langar þig að láta gott af þér leiða á Austurlandi?
Innanlandsstarf 14. apríl 2026Rauði krossinn í Múlasýslu býður upp á spennandi námskeið fyrir nýja og núverandi sjálfboðaliða. Námskeiðin eru opin öllum sem langar til að kynna sér störf Rauða krossins og sjálfboðaliða á svæðinu.