Rauði krossinn og Íslandsbanki undirrituðu síðastliðin föstudag samning um 4 milljón króna stuðning bankans við langtímaþróunarsamvinnu Rauða krossins í Malaví, sem í tæpa þrjá áratugi hefur skilað metnaðarfullri uppbyggingu og valdeflingu fátækra samfélaga í Malaví, einu fátækasta og þéttbýlasta landi heims. Áhersla er lögð á að bæta aðgengi berskjaldaðs fólks á dreifbýlum svæðum að heilbrigðisþjónustu og öruggu drykkjarvatni; fjölda berskjaldaðra barna er tryggð skólaganga og neyðarvarnir samfélaga hafa verið stórauknar, en hamfarir af völdum loftslagsbreytinga verða æ tíðari í Malaví.

Fjármagn Íslandsbanka verður nýtt til þess að efla þann verkefnisþátt sem felst í valdeflingu kvenna og ungmenna. Þá sér í lagi þann þátt sem kallast Savings and Loans Associations (SLA). SLA eru hópar, kvenna annars vegar og ungmenna hins vegar, sem búa í sama þorpi og vinna saman að því að spara fjármagn og lána sín á milli til ýmissa verkefna auk þess sem oft er ráðist í stærri sameiginleg verkefni. Á þessum slóðum er SLA yfirleitt fyrsta skref kvenna og ungmenna til að öðlast t.d. fjármálalæsi og þekkingu á rekstri. Með slíka þekkingu í veganesti eru þau betur í stakk búin að sækja þjónustu stofnana sem sinna örlánastarfsemi (e. microfinance).

Fjármagn Íslandsbanka mun styðja við heimsmarkmiðin: 4: Menntun fyrir alla, 5: Jafnrétti kynjanna og 9: Nýsköpun og uppbygging.

Á forsíðumynd má sjá Grace Chisesa, fimm barna móðir í Njolomola þorpi í Mwanza-héraði í sunnanverðri Malaví stendur hér í matjurtagarðinum sínum. Þessi tegund ræktunar kallast \"keyhole gardening\" en eins og sjá má líkist form garðsins lyklaopi. Slíkir garðar þola mun meiri þurrka en hefðbundin matjurtabeð og nýta matarleifar sem næringu, t.d. bananahýði og maískjarna. Grace útbjó matjurtagarðinn eftir að hafa fengið fræðslu og kennslu frá Rauða kross sjálfboðaliða Njolomola þorps.