Almennar fréttir
Róró færir Rauða krossinum Lúllu dúkkur að gjöf
20. maí 2021
Á dögunum fékk Rauði krossinn 25 Lúllu dúkkur að gjöf. Dúkkurnar fara meðal annars í sérstaka ungbarnapakka sem Rauði krossinn gefur barnshafandi konum sem sækja um alþjóðlega vernd á Íslandi.
Á dögunum fékk Rauði krossinn 25 Lúllu dúkkur að gjöf frá Róró, fyrirtækinu á bakvið dúkkurnar vinsælu.
Dúkkurnar fara meðal annars í sérstaka ungbarnapakka sem Rauði krossinn gefur barnshafandi konum sem sækja um alþjóðlega vernd á Íslandi. Pakkarnir innihalda til dæmis barnaföt, þar á meðal heimfarasett prjónuð af sjálfboðaliðum Rauða krossins en áhersla er lögð á að hafa pakkana bæði fallega og nytsamlega.
Lúlla dúkkan frá Róró stuðlar að bættum svefni, vellíðan og öryggistilfinningu barna en dúkkan, sem er hönnuð eftir rannsóknum, spilar upptöku af raunverulegri öndun og hjartslætti sem hefur róandi áhrif á börn á öllum aldri.
Það var Eyrún Eggertsdóttir, stofnandi Róró, sem afhenti dúkkurnar þeim Þóri Hall Stefánssyni og Guðrúnu Brynjólfsdóttur á hjálpar- og mannúðarsviði Rauða krossins.
Þórir Hall Stefánsson, verkefnastjóri í málefnum umsækjenda um alþjóðlega vernd:
Við kunnum Róró bestu þakkir fyrir þessa rausnarlegu og afar nytsamlegu gjöf. Þetta er í annað sinn sem við fáum Lúllu dúkkur að gjöf og þær hafa nú þegar slegið í gegn hjá skjólstæðingum Rauða krossins, bæði sem hluti af ungbarnapökkum fyrir nýbura og sem gjöf til eldri barna. Það verður okkur sönn ánægja að koma dúkkunum 25 áfram til nýrra eigenda og við vonumst til að þetta fallega og góða samstarf við Róró sé komið til að vera.
Fréttir af starfinu
Fréttayfirlit
Gleðilega hinsegin daga / Reykjavík Pride
Almennar fréttir 05. ágúst 2022Fánar Hinsegin daga blakta við hún við Rauða kross húsið í Efstaleiti 9.
Útkall á Keflavíkurflugvelli
Almennar fréttir 26. júlí 2022Viðbragðshópar Rauða krossins á höfuðborgarsvæðinu og af Suðurnesjum voru kallaðir út í gær vegna flugvélar á leið frá Þýskalandi til Bandaríkjana er var snúið við yfir Grænalandi vegna sprengjuhótunar.
Hvert handtak skiptir máli
Almennar fréttir 19. júlí 2022Fataverkefni Rauða krossins stuðlar að sjálfbærni og umhverfisvend. Verkefnið er borið upp af sjálfboðaliðum og samfélagsþjónum, en sjálfboðaliðar sjá um að tæma söfnunargáma og afgreiða í búðunum, og samfélagsþjónar starfa í fataflokkunarstöðinni. Undanfarið hefur Rauði krossinn sannarlega fundið fyrir mikilli velvild í samfélaginu, en sjaldan hefur almenningur gefið eins mikið af fötum og salan í verslunum á höfuðborgarsvæðinu er nú á pari við bestu sölu síðan árið 2013.