Almennar fréttir
Samningur við stjórnvöld um fræðslu í tengslum við menningarnæmi og fjölmenningu
04. janúar 2023

Rauði krossinn á Íslandi og félags- og vinnumarkaðsráðuneytið undirrituðu í dag samning um fræðslu um menningarnæmi og fjölmenningu fyrir þjónustu- og viðbragðsaðila sem sinna þolendum og gerendum ofbeldis af erlendum uppruna.
Töluverð áskorun hefur verið að ná til innflytjenda sem eru fórnarlömb ofbeldis og benda tölur til þess að þolendur ofbeldis af erlendum uppruna sæki sér síður aðstoð en aðrir. Mikilvægt er að þau sem þjónustuna veita geri sér góða grein fyrir því hvernig best er að nálgast bæði þolendur og gerendur með ólíkan menningarbakgrunn. Menningarnæmi og þekking á fjölmenningu er því mikilvæg öllum þeim sem vinna með innflytjendum.
Rauði krossinn hefur rekið ýmis brautryðjendaverkefni í þágu innflytjenda hér á landi og sinnt öflugu starfi með flóttafólki frá árinu 1956. Þá gegnir félagið stoðhlutverki við stjórnvöld í samræmi við lög nr. 115/2014.
„Við erum spennt að leggja okkar lóð á vogarskálarnar í baráttunni gegn ofbeldi og teljum að reynsla okkar og þekking nýtist vel þeim þjónustu- og viðbragðsaðilum sem sinna þolendum og gerendum ofbeldis,“ segir Silja Bára Ómarsdóttir formaður Rauða krossins.
„Vegna þess trausts sem Rauði krossinn nýtur, bæði meðal nýrra íbúa sem og þeirra sem þegar búa hér, nálgast innflytjendur félagið oft með mjög viðkvæm og persónuleg málefni. Flóttafólk og innflytjendur koma oft og tíðum frá svæðum þar sem traust til stjórnvalda er takmarkað og hefur Rauði krossinn lagt á það áherslu að kynna þjónustu hins opinbera og byggja brú á milli stjórnvalda og þeirra sem hafa nýlega sest að á Íslandi með það að markmiði að auka traust á stjórnvöldum og kynna þau úrræði sem standa innflytjendum til boða,” segir Silja Bára og bætir við að það sé í samræmi við markmið stefnu Rauða krossins um opið, fjölbreytt og friðsælt samfélag sem byggir á samfélagslegri þátttöku, jöfnun tækifærum og samheldni.
Fréttir af starfinu
Fréttayfirlit
Fjármögnun neyslurýma áskorun um alla Evrópu
Innanlandsstarf 25. júní 2025Þrátt fyrir að neyslurými fyrir vímuefni hafi fyllilega sannað gildi sitt gagnvart bæði einstaklingum og samfélögum glíma þau við sama vandamálið, hvort sem þau eru í Barcelona eða Borgartúni. Starfsfólk skaðaminnkunarverkefna Rauða krossins sótti upplýsandi ráðstefnu í Strassborg.

Nýtt forvarnarátak: Öryggi barna í sundi
Innanlandsstarf 23. júní 2025„Drukknun er algengari en flestir halda og stundum er því talað um hinn þögla faraldur,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. Félagið hefur hleypt af stokkunum fræðslu- og forvarnarátaki um öryggi barna í sundi í samvinnu við Reykjavíkurborg og Samtök forstöðumanna sundstaða á Íslandi.

Sigríður tekur við formennsku af Silju Báru
Almennar fréttir 19. júní 2025„Ég tek við starfi formanns með mikilli auðmýkt, tilhlökkun og virðingu fyrir öllum þeim sem starfa fyrir Rauða krossinn, bæði sjálfboðaliðum og starfsfólki,“ segir Sigríður Stefánsdóttir, nýr formaður Rauða krossins á Íslandi.