Almennar fréttir
Sjóvá styrkir neyðarvarnir Rauða krossins um 15 milljónir króna
03. desember 2020
Stuðningur Sjóvá mun efla viðbúnað Rauða krossins við hvers kyns krísum og hamförum
Sjóvá hefur ákveðið að styrkja neyðarvarnir Rauða krossins um 15 milljónir.
Rauði krossinn býr yfir þéttu neti sjálfboðaliða víðs vegar um landið sem bregst við fjölda alvarlegra atburða, svo sem náttúruhamförum, samgönguslysum, húsbrunum og vinnuslysum. Sjálfboðaliðar og starfsfólk búa yfir mismunandi sérþekkingu, m.a. í stjórnun aðgerða, uppsetningu fjöldahjálparstöðva og í að veita sálrænan stuðning og skyndihjálp þegar mikið liggur við. Þörfin fyrir þessar neyðarvarnir Rauða krossins hefur aukist gríðarlega á undanförnum árum, s.s. í tengslum við veðurofsa og náttúruhamfarir.
„Við erum afskaplega þakklát fyrir þetta rausnarlega framlag. Stuðningur Sjóvá mun efla viðbúnað við hvers kyns krísum og hamförum, en við leggjum sérstaka áherslu á viðbúnað í smærri byggðum víðs vegar um landið og að fólk sé búið undir hamfarir, geti brugðist við þeim og eflst í kjölfar þeirra“ segir Kristín S. Hjálmtýsdóttir, framkvæmdastjóri Rauða krossins á Íslandi.
Framlag Sjóvár verður nýtt til að þjálfa viðbragðshópa félagsins í sálrænum stuðningi og til kaupa á neyðarbúnaði, sem gerir sjálfboðaliðum félagsins um allt land kleift að aðstoða fólk án tafar í kjölfar alvarlegra atburða.
„Það er okkur mikil ánægja að geta stutt við þetta mikilvæga starf Rauða krossins með þessum hætti. Við vitum að sú aðstoð sem Rauði krossinn veitir á vettvangi skiptir gríðarlegu máli og þetta málefni rímar afar vel við hlutverk okkar hjá Sjóvá og áherslur í styrktarmálum og þau heimsmarkmið sem við höfum valið okkur að vinna að“ segir Hermann Björnsson, forstjóri Sjóvá.
Fréttir af starfinu
Fréttayfirlit
Rauði krossinn fjölgar fatakössum á höfuðborgarsvæðinu
Almennar fréttir 18. nóvember 2025Nýjum söfnunarkössum Rauða krossins fyrir fatnað og annan textíl hefur verið komið fyrir við fimm Bónusverslanir á höfuðborgarsvæðinu. Samtals eru kassarnir því á sjö stöðum á svæðinu og stefnt er á frekari útbreiðslu á næstu misserum.
Samstaða sómalskra kvenna drifkraftur umbóta
Alþjóðastarf 06. nóvember 2025„Þrátt fyrir takmörkuð úrræði deila sómalskar konur þeirri öflugu hugsjón að konur séu konum bestar,“ segir Natalia Herrera Eslava, verkefnastjóri hjá Rauða krossinum á Íslandi. Starf sómalska Rauða hálfmánans, sem Rauði krossinn á Íslandi styrkir, er mikilvægara nú en nokkru sinni.
Auglýsing um sögu Rauða krossins tilnefnd til verðlauna
Almennar fréttir 05. nóvember 2025„Saga Rauða krossins á Íslandi er löng og litrík og við lögðum mikla vinnu í að fanga rétta tilfinningu,“ segir hönnunarstjóri Strik Studio um tilnefningu til verðlauna á einni stærstu hönnunarhátíð Evrópu.