Almennar fréttir
Söfnun fyrir Palestínu lokið
02. júní 2021
Þann 11. maí sl. hrinti Rauði krossinn á Íslandi af stað söfnun fyrir íbúa Palestínu og er henni nú lokið. Alls söfnuðust tæplega 11 milljónir frá almenningi og deildum félagsins.
Þann 11. maí sl. hrinti Rauði krossinn á Íslandi af stað söfnun fyrir íbúa Palestínu og er henni nú lokið. Alls söfnuðust tæplega 11 milljónir frá almenningi og deildum félagsins. Við viljum þakka öllum þeim sem lögðu söfnuninni lið - bæði fyrir fjárframlögin en líka sérstaklega þakka þeim er deildu fréttum Rauða krossins á samfélagsmiðlum varðandi erfiðar aðstæður íbúa Palestínu, sem skiptir ekki síður miklu máli fyrir eins mikilvægt málefni.
Í kjölfar neyðarsöfnunarinnar mun Rauði krossinn á Íslandi senda samtals 42 milljónir króna til systurfélags síns í Palestínu. Með stuðningi Mannvina getur Rauði krossinn lagt í heildina rúmar 20 milljónir til viðbótar því sem hefur safnast frá almenningi og deildum félagsins og að auki nýtt 11 milljónir af rammasamningi félagsins við utanríkisráðuneytið.
Fjármagnið sem Rauði krossinn sendir til Palestínu mun annars vegar nýtast til að svara neyðarkalli palestínska Rauða hálfmánans vegna ástandsins undanfarnar vikur. Hins vegar mun fjárframlagið tryggja áframhaldandi sálfélagslegan stuðning í Palestínu, einkum fyrir börn og ungmenni, en Rauði krossinn á Íslandi hefur stutt verkefnið í hartnær 20 ár, ásamt systurfélagi sínu í Danmörku.
Kristín S. Hjálmtýsdóttir framkvæmdastjóri Rauða krossins segir að söfnunin hafi gengið vel. „Við erum óskaplega þakklát öllum þeim sem lögðu söfnuninni lið. Með sameiginlegu átaki náum við að koma þeim verst stöddu í Palestínu til hjálpar. Við hjá Rauða krossinum þökkum almenningi, Mannvinum og utanríkisráðuneytinu fyrir stuðninginn af heilum hug.“
Fréttir af starfinu
FréttayfirlitAðalfundur Hafnafjarðar, Garðabæjar og Kópavogsdeildar
Almennar fréttir 14. mars 2024Aðalfundur Hafnafjarðar, Garðabæjar og Kópavogsdeildar var haldin í gær 13.mars og gekk fundur einkar vel. Það var fámennt á fundi en góðmennt og góðar umræður mynduðust um mikilvæg málefni sem snerta verkefni deildar og Rauða krossins í heild sinni.
Neyðarsöfnun fyrir Grindvíkinga lokið
Innanlandsstarf 12. mars 2024Rauði krossinn hefur lokið neyðarsöfnuninni fyrir íbúa Grindavíkur. Hægt er að sækja um fjárstuðning til 19. mars og síðasta úthlutun úr söfnuninni fer fram þann 20. mars. Alls hefur rúmlega 51 milljón kr. safnast.
Framúrskarandi sjálfboðaliðar heiðraðir
Innanlandsstarf 11. mars 2024Höfuðborgardeild Rauða krossins heiðraði þrjá sjálfboðaliða fyrir framúrskarandi framlag innan fjölbreyttra verkefna deildarinnar á aðalfundi sínum í síðustu viku.