Innanlandsstarf
Framúrskarandi sjálfboðaliðar heiðraðir
11. mars 2024
Höfuðborgardeild Rauða krossins heiðraði þrjá sjálfboðaliða fyrir framúrskarandi framlag innan fjölbreyttra verkefna deildarinnar á aðalfundi sínum í síðustu viku.
Í síðustu viku heiðraði höfuðborgardeild Rauða krossins þrjá sjálfboðaliða, þau Helenu Kristínu Jónsdóttur, Albert Björn Lúðvígsson og Birki Frey Ólafsson, fyrir framúrskarandi framlag innan fjölbreyttra verkefna deildarinnar.
Viðurkenningar fyrir sjálfboðastörf eru veittar árlega á aðalfundi höfuðborgardeildar. Starfsfólk tilnefnir sjálfboðaliða og tillögurnar eru svo lagðar fyrir stjórn, en til að verða fyrir valinu þurfa sjálfboðaliðarnir að uppfylla nokkur ólík skilyrði.
Helena Kristín Jónsdóttir
Verkefni: Verslun - Landspítali Fossvogi
Helena hefur staðið sig einstaklega vel í starfi og hefur unnið í versluninni í 26 ár, eða síðan 1998. Hún er góður og tryggur starfsmaður sem er alltaf til í að hlaupa í skarðið ef þess er óskað. Helena er virkur þátttakandi í félagsstarfinu og hefur verið góð í að hvetja nýtt fólk til þátttöku.
Albert Björn Lúðvígsson
Verkefni: Frú Ragnheiður – skaðaminnkun
Albert er sjálfboðaliði hjá Frú Ragnheiði og hefur verið virkur síðan september 2018. Albert sinnir bílstjóravöktum í verkefninu en hefur einnig stokkið inn í önnur hlutverk þegar þörf er á. Hann er gríðarlega áreiðanlegur sjálfboðaliði sem er alltaf hægt að treysta á. Albert mikilvægur málsvari fyrir notendur þjónustunnar og verkefnið sjálft.
Birkir Freyr Ólafsson
Verkefni: Leiðsöguvinir flóttafólks
Birkir hefur tekið þátt í verkefninu Leiðsöguvinir síðan árið 2017. Hann hefur lokið sex leiðsöguvina pörunum og hefur núna tvo vini að auki. Birkir er afar virkur sjálfboðaliði, honum er annt um vini sína og heldur áfram að vera vinur þeirra þrátt fyrir að verkefnin klárist. Birkir hefur kennt vinum sínum ýmislegt um íslenska menningu og aðstoðað þau við allt milli himins og jarðar. Hann stefnir á að taka þátt í fleiri verkefnum í framtíðinni.
Fréttir af starfinu
Fréttayfirlit
Kvennadeild Reykjavíkurdeildar styrkir Frú Ragnheiði um 1.300.000 krónur
Almennar fréttir 24. janúar 2025Kvennadeild Reykjavíkurdeildar Rauða krossins afhenti nýverið skaðaminnkunarverkefni Rauða krossins, Frú Ragnheiði, styrk að andvirði 1.300.000 króna. Upphæðin er afrakstur sölu á jólabasar kvennadeildarinnar, auk handverks sem framleitt var af Prjónahópnum og selt í sölubúðum á Landspítalanum við Hringbraut og í Fossvogi.
Neyðarsöfnun fyrir íbúa Gaza
Almennar fréttir 23. janúar 2025Milljónir Palestínufólks á Gaza þurfa hjálp – strax. Rauði krossinn safnar fyrir mat, skjóli, hreinu vatni og heilbrigðisaðstoð.
Hugmyndarík frændsystkin söfnuðu fyrir Rauða krossinn
Almennar fréttir 23. janúar 2025Frændsystkinin þrjú, Árný Ýr, Bjarki Freyr og Tinna eru aldeilis hugmyndarík þegar kemur að því að safna fé fyrir Rauða krossinn. Þau ákváðu að setja upp sína eigin litlu nuddstofu og bjóða fjölskyldu og ættingjum í fóta- og herðanudd gegn framlagi til söfnunarinnar.