Innanlandsstarf
Haldið upp á 112-daginn um helgina
13. febrúar 2023
112-dagurinn var haldinn hátíðlegur á laugardag í Hörpu. Við það tækifæri var skyndihjálparmanneskja ársins 2022 útnefnd, en ungur drengur sem bjargaði lífi bróður síns varð fyrir valinu í þetta sinn.
Arnór Ingi Davíðsson var valinn skyndihjálparmanneskja ársins 2022, en hann bjargaði lífi yngri bróður síns þegar þeir lentu í snjóflóði fyrir tæpu ári, en þá voru þeir 14 og 10 ára. Arnór fékk viðurkenninguna vegna þess að hann brást rétt við þegar bróðir hans grófst í snjó. Hann hafði strax samband við neyðarlínuna og var svo hjá bróður sínum, fylgdi leiðbeiningum neyðarlínunnar í hvívetna og hélt Bjarka rólegum þar til hjálpin barst.
Arnór þakkaði sérstaklega þeim viðbragðsaðilum sem höfðu komið að björgun bróður hans og var þakklátur fyrir viðurkenninguna. Hann og bróðir hans Bjarki tóku við viðurkenningarskjali, gjafabréfi á skyndihjálparnámskeið, skyndihjálpartösku, Apple Airpods Pro frá Nova og fullum kassa af rauðum karamellum frá Góu, en það er uppáhalds sælgæti þeirra bræðra.
Miklu var tjaldað til á 112-deginum í Hörpu á laugardag, en þema dagsins í ár var „Hvað get ég gert?“ og var ætlunin að vekja fólk til vitundar um hvernig það getur brugðist við þegar neyðarástand skapast. Gestir gátu skoðað fjöldahjálpartjöld Rauða krossins, kynnst skyndihjálp og virt fyrir sér alls kyns tækjabúnað viðbragðsaðila, ásamt því að fá ýmsa fræðslu um þau mikilvægu störf sem þeir vinna.
Jón Svanberg Hjartarson, framkvæmdastjóri neyðarlínunnar, og Jón Gunnarsson, dómsmálaráðherra, fluttu líka ávörp og hópi barna voru afhent verðlaun í Eldvarnargetraun Landssambands slökkviliðs- og sjúkraflutningamanna. Dagskrá dagsins lauk svo með frumflutningi á nýja 112-laginu.
Hér má sjá fréttir frá deginum:
https://www.visir.is/g/20232376829d/bjargadi-lifi-litla-brodur-sins
https://www.mbl.is/frettir/innlent/2023/02/11/helt_hann_myndi_missa_brodur_sinn/
-----
Rauði krossinn á Íslandi tilheyrir allri þjóðinni, en án stuðning hennar getur félagið ekki sinnt þeim fjölmörgu mikilvægu verkefnum sem það stendur fyrir, samfélaginu til góðs. Hjálpaðu okkur að hjálpa öðrum með því að gerast Mannvinur.
Fréttir af starfinu
Fréttayfirlit
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.
Kristín S. Hjálmtýsdóttir lætur af störfum sem framkvæmdastjóri Rauða krossins á Íslandi
Almennar fréttir 02. desember 2024Stjórn Rauða krossins á Íslandi og Kristín S. Hjálmtýsdóttir, framkvæmdastjóri félagsins síðastliðin 9 ár, hafa gert samkomulag um starfslok hennar. Viðræður um starfslokin áttu sér stað að frumkvæði Kristínar, sem hefur nú þegar látið af störfum. Arna Harðardóttir sem gengt hefur starfi fjármálastjóra mun taka við verkefnum framkvæmdastjóra samhliða sínum störfum þar til nýr framkvæmdastjóri hefur verið ráðinn. Staðan verður auglýst innan skamms.