Innanlandsstarf

Nítján nýútskrifaðir leiðbeinendur í skyndihjálp

19. mars 2026

Leiðbeinendur Rauða krossins í skyndihjálp eru nú orðnir 90 talsins eftir nýafstaðið námskeið þar sem 19 nýir leiðbeinendur voru útskrifaðir.

Þátttakendur á leiðbeinendanámskeiðinu ásamt reyndum leiðbeinendum sem miðluðu þar af þekkingu sinni.

Rauði krossinn útskrifaði nýverið nítján nýja leiðbeinendur í skyndihjálp. Hópurinn sótti fjögurra daga námskeið, bæði verklegt og bóklegt, í höfuðstöðvum Rauða krossins í Efstaleiti í Reykjavík. „Nú breiða þau út vængina og fara um landið að leiðbeina á skyndihjálparnámskeiðum sem félagið heldur,“ segir Hildur Vattnes Kristjánsdóttir, teymisstóri í skyndihjálp hjá Rauða krossinum.

Með þessari góðu viðbót eru leiðbeinendur á vegum Rauða krossins í skyndihjálp nú orðnir 90 talsins. „Það er í takti við okkar markmið en þau snúast um að breiða út boðskap skyndihjálpar sem víðast og til sem flestra undir leiðsögn sérþjálfaðra og framúrskarandi leiðbeinenda,“ segir Hildur. „Það er nefnilega staðreynd að það að kunna að bregðast hratt og rétt við þegar einhver er í neyð getur skilið á milli lífs og dauða.“

Yfir 10 þúsund lærðu skyndihjálp 2025

Hópur reyndra leiðbeinenda miðlaði þekkingu sinni til nýliðanna á námskeiðinu. „Það er ekki nóg að leiðbeinendur kunni sjálfir skyndihjálp, þeir þurfa að hafa færni til að miðla henni til annarra,“ segir Hildur.
Á síðasta ári voru haldin 684 skyndihjálparnámskeið á vegum Rauða krossins sem 10.566 manns sóttu.

Hildur segir mikla vakningu vera um nauðsyn þess að kunna skyndihjálp. Fyrir utan það að læra réttu handtökin við að aðstoða slasaða eða veika öðlast þátttakendur á skyndihjálparnámskeiðum aukið sjálfstraust. „Það er ekki aðeins valdeflandi fyrir einstaklingana að kunna skyndihjálp heldur eykur það seiglu samfélagsins.“

Hér getur þú séð næstu námskeið á vegum Rauða krossins.

Bökuðu 470 smákökur til styrktar Rauða krossinum

Almennar fréttir 24. apríl 2026

Fjögur bekkjarsystkin úr 4. bekk í Barnaskóla Kársness lögðu eldhús heima hjá einu þeirra undir sig um helgina og bökuðu hvorki fleiri né færri en 470 kexkökur sem þau svo seldu til styrktar Rauða krossinum. „Fyrir börn sem þurfa hjálp,“ segja þau.

Að upplifa þakklætið gefur svo gott í hjartað

Innanlandsstarf 20. apríl 2026

Framlag Sigríðar Birnu Sigvaldadóttur til verkefna Rauða krossins með fólki í afplánun „hefur skilað sér í raunverulegri breytingu fyrir marga,“ segir í rökstuðningi stjórnar höfuðborgardeildar Rauða krossins sem hefur valið hana einn af sjálfboðaliðum ársins. „Það er gott að geta haft jákvæð áhrif á líf annarra,“ segir Sigríður.

Langar þig að láta gott af þér leiða á Austurlandi?

Innanlandsstarf 14. apríl 2026

Rauði krossinn í Múlasýslu býður upp á spennandi námskeið fyrir nýja og núverandi sjálfboðaliða. Námskeiðin eru opin öllum sem langar til að kynna sér störf Rauða krossins og sjálfboðaliða á svæðinu.