Innanlandsstarf
Skaðaminnkandi þjónusta kynnt á Akureyri
08. maí 2023
Næsta miðvikudag verður Rauði krossinn við Eyjafjörð með kynningu á þeirri skaðaminnkandi þjónustu sem boðið er upp á í Frú Ragnheiði og Naloxone nefúðanum.

Rauði krossinn við Eyjafjörð heldur kynningu á skaðaminnkunarverkefninu Frú Ragnheiði næsta miðvikudag kl. 16:30 í húsnæði sínu við Viðjulund 2 á Akureyri. Þar verður farið yfir hvað felst í þjónustu Frú Ragnheiðar og notkun á Naloxone nefúða verður kynnt, en nefúðinn getur veitt lífsbjargandi neyðaraðstoð við ofskömmtun.
Rauði krossinn á Íslandi rekur skaðaminnkunarverkefnið Frú Ragnheiður á þremur stöðum á landinu, á Höfuðborgarsvæðinu, á Suðurnesjum og á Akureyri. Frú Ragnheiður vinnur eftir skaðaminnkandi hugmyndafræði sem gengur út á að takmarka skaðann og áhættuna sem getur fylgt vímuefnanotkun í æð og að bæta lífsgæði og heilsufar notenda, fremur en að reyna að fyrirbyggja notkunina sjálfa. Þannig má takmarka skaðann sem fylgir þessari notkun, bæði fyrir notendur og samfélagið í heild.
Við hvetjum öll sem hafa áhuga á vímuefnamálum og skaðaminnkandi hugmyndafræði, hvort sem um að ræða almenning, fagfólk, notendur eða aðstandendur þeirra, til að koma að kynna sér þjónustuna.
Vilja fræða til að draga úr fórdómum
„Við ákváðum að halda þessa kynningu til að leyfa almenningi að koma og kynnast starfinu, fá fræðslu og spjalla við sjálfboðaliðana okkar,“ segir Edda Ásgrímsdóttir, hjúkrunarfræðingur og hópstjóri hjá Frú Ragnheiði á Akureyri. „Við teljum mikilvægt að kynna Frú Ragnheiði fyrir almenningi til þess að reyna draga úr fordómum og hvetja til skaðaminnandi hugsunar. Með fræðslu teljum við að fleiri geti tamið sér skaðaminnkandi hugsun, sem skilar sér svo vonandi í minni fordómum í garð viðkvæma skjólstæðingahópsins okkar.
Dagskráin verður létt og þægileg, við verðum með nokkrar stöðvar þar sem gestir geta kynnst mismunandi hliðum verkefnisins, svo sem heilbrigðishlutanum sem er t.d. meðhöndlun sára og sýkinga, nálaskiptahlutanum sem er þá búnaðurinn sem við bjóðum upp á og einnig verður í boði að æfa sig í endurlífgun með aðstoð sérhæfðs starfsmanns,“ útskýrir Edda. „Að lokum verðum við með fræðslu um Naloxone-nefúðann og afhendum þeim sem telja sig þurfa hann. Við erum mjög spenntar fyrir þessari kynningu og vonumst til að sjá sem flesta.“
Fréttir af starfinu
Fréttayfirlit
Öflugt hjálparstarf í Marokkó en framtíðin ótrygg
Alþjóðastarf 29. september 2023Rauði hálfmáninn í Marokkó hefur náð miklum árangri í hjálparstarfi sínu vegna jarðskjálftans sem varð þar fyrir þremur vikum, en það er mikil þörf á langtíma stuðningi á svæðunum sem urðu verst úti.

Enn hamfaraástand í Líbíu
Alþjóðastarf 27. september 2023Líbíska þjóðin stendur enn frammi fyrir gríðarlegum áskorunum vegna hamfaranna sem fylgdu storminum Daníel fyrr í mánuðinum. Rauði krossinn hefur lagt sitt af mörkum til taka þátt í neyðarviðbragðinu.

Söfnuðu fyrir Rauða krossinn
Almennar fréttir 20. september 2023Þessar stelpur söfnuðu fyrir Rauða krossinn með ýmsum aðferðum.