Innanlandsstarf
Styrktu sjálfstraust og sjálfsmynd ungmenna á Akureyri
09. nóvember 2023
Rauði krossinn við Eyjafjörð hélt nýverið sjálfsstyrkingarnámskeið fyrir ungmenni með erlendan bakgrunn. Að námskeiðinu loknu var sjáanlegur munur á sjálfstrausti og samskiptum ungmennanna.

Námskeiðið, sem gekk undir heitinu Seigla, var ætlað ungmennum með erlendan bakgrunn á aldrinum 16-25 ára og fór fram á fjögurra vikna tímabili í haust. Þar var boðið upp á ýmis konar virkni og vinnustofur sem ætlað var að efla félagshæfni og samskiptafærni ungmennanna í vernduðu og hvetjandi umhverfi. Markmiðið var að auka sjálfstraust og bæta sjálfsmynd þátttakenda, sem myndi stuðla að auknum tækifærum til inngildingar í íslenskt samfélag.
Kveikjan að verkefninu voru áhyggjur af því að rannsóknir benda til að þessi þjóðfélagshópur sé í sérstaklega viðkvæmri stöðu og eigi á hættu að vera bæði án atvinnu og utan skóla, sem eykur hættuna á jaðarsetningu og fækkar tækifærum til þátttöku í samfélaginu.
Þróað í samstarfi við ungmennin
Námskeiðið stóð öllum ungmennum með erlendan bakgrunn til boða, en lögð var sérstök áhersla á að hvetja ungmenni með flóttabakgrunn til að taka þátt. Þróun námskeiðsins fór einnig fram í samstarfi við þessi ungmenni, en haldinn var undirbúningsfundur með þeim þar sem rætt var um þá virkni og afþreyingu sem var í boði á Norðurlandi. Þau völdu svo það sem þau vildu að væri hluti af námskeiðinu. Reiðtúr, paintball, zipline, skautar og fjallahjólaferð urðu fyrir valinu og það gekk vel að verða við þessum óskum, en fjallahjólaferð varð ekki að raunveruleika svo gokart-kappakstur kom í staðinn.
Samið var við Dale Carnegie um að aðlaga námskeið sem nefnist „Lyklar að lífinu“ að þessum hópi, og hélt þjálfari á þeirra vegum vinnustofur með þátttakendum. Sóley Ómarsdóttir, sérfræðingur í sálfélagslegum stuðningi hjá Rauða krossinum, hélt einnig vinnustofu fyrir ungmennin og Miriam Petra Ómarsdóttir Awar, sérfræðingur hjá Rannís, ræddi við hópinn um sína vegferð, þá tilfinningu að upplifa sig utangarðs og hvað fælist í því að vera Íslendingur og tilheyra samfélaginu.
Vinnustofur námskeiðsins voru vel heppnaðar. Ungmennin tóku virkan þátt, voru áhugasöm og sögðust hafa gagn af því sem þau voru að læra.
Gekk vel og þörfin er skýr
Námskeiðið gekk vel og greinilega mátti sjá mun á sjálfstrausti ungmennanna og samskiptum þeirra innbyrðis að því loknu. Verkefnið hefur styrkt þá trú að mikilvægt sé að huga sérstaklega að ungmennum með erlendan bakgrunn á Eyjafjarðarsvæðinu. Vísbendingar eru um að þessi hópur sé svolítið út af fyrir sig og njóti ekki sama aðgengis að samfélaginu og jafnaldrar af íslenskum uppruna.
Vonandi verður þetta verkefni stökkpallur fyrir frekari þátttöku og inngildingu þessara ungmenna í félagsstarf á svæðinu. Rauða krossinn hefur mikinn áhuga á að vinna áfram að því markmiði.
Fréttir af starfinu
Fréttayfirlit
Stjórnvöld fordæmi brot á mannúðarlögum hátt og skýrt
Alþjóðastarf 26. ágúst 2025„Það er mikilvægt að stjórnvöld alls staðar, líka í litlum, friðsælum ríkjum eins og Íslandi, leggi áherslu á virðingu fyrir alþjóðlegum mannúðarlögum og fordæmi hátt og skýrt þegar þau eru brotin,“ sagði Gísli Rafn Ólafsson, framkvæmdastjóri Rauða krossins, í viðtali á Morgunvaktinni á Rás 1 um stöðu mannúðaraðstoðar í heiminum.

Ókeypis vefnámskeið í sálrænni fyrstu hjálp
Almennar fréttir 25. ágúst 2025Rauði krossinn býður nú upp á vefnámskeið um sálræna fyrstu hjálp á íslensku. Allir sem vilja vera til staðar fyrir aðra þegar á reynir geta nýtt sér námskeiðið.

Ylja neyslurými Rauða krossins er 1 árs
Innanlandsstarf 12. ágúst 2025Á fyrsta starfsári sínu hefur Ylja sýnt fram á þörf fyrir öruggt neyslurými, þar sem notendur upplifa virðingu, öryggi og væntumþykju í stað útskúfunar og hættu. Traust notenda til þjónustunnar hefur byggst hratt upp vegna góðra tengsla milli notenda, starfsfólks Ylju og samstarfsaðila og lagt grunn að árangursríkri þjónustu.