Alþjóðleg verkefni Rauða krossins á Íslandi

Áherslur Rauða krossins á Íslandi í alþjóðastarfi lúta að jafnrétti kynjanna og aukinni vernd berskjaldaðra hópa. Þá er lögð áhersla á að styrkja landsfélög Rauða krossins og Rauða hálfmánans svo þau geti betur sinnt sjálfbæru hjálpar- og mannúðarstarfi í sínum samfélögum. Þá er lögð þung áhersla á draga úr áhrifum loftslagsbreytinga og forvarnir við þeim.

Áhersluatriði okkar

Rauði krossinn á Íslandi leggur áherslu á uppbyggingu sérfræðiþekkingar í alþjóðlegu starfi. Áhersluatriði okkar leiða af sér örugg, heilbrigð og sjálfbær samfélög og styðja atriðin við hvort annað.

Við leggjum mikið upp úr samstarfi og trúum því að samstarf og heildstæð nálgun feli í sér mikið virði og árangur.

Þverlægar áherslur í verkefnum

Jafnrétti, vernd og þátttaka án aðgreiningar

Jafnrétti og vernd tengist inn í allar aðrar áherslur hjá okkur og er í raun kjarni verkefna okkar. Geðheilbrigði og sálfélagslegur stuðningur er einnig hluti af vernd í okkar starfi og fellur því einnig hér undir. Með jafnrétti er sérstök áhersla lögð á valdeflingu kvenna og stúlkna.

Efla nærsamfélagið

Uppbygging og sjálfbærni í starfi landsfélaga er önnur þverlæg áhersla í alþjóðastarfinu okkar. Hún snertir á því að styrkja getu og hæfni landsfélaga í öðrum þverlægum áherslum. Allur stuðningur og aðstoð sem við veitum styður við getu nærsamfélagsins.

Aðgerðir til að sporna við loftslagsvá

Þessi áhersla er tiltölulega nýtilkomin í alþjóðastarfi Rauða krossins á Íslandi. Fyrst um sinn er áherslan lögð á að byggja upp samstarf við sérfræðinga í hamfarahlýnun og loftslagsmálum og efla okkar eigin getu til að geta stutt við önnur landsfélög.

Smelltu hér til að lesa stefnu okkar í alþjóðlegum verkefnum.

Stuðningur við hjálparstarf í Úkraínu

Mannúðarkrísan í Úkraínu er sú versta sem sést hefur í Evrópu í áratugi og virðist líkleg til að versna enn frekar áður en hún fer að batna. Alþjóðahreyfing Rauða krossins er í einstakri stöðu til að veita íbúum á átakasvæðum aðstoð og Rauði krossinn á Íslandi, með stuðningi frá Utanríkisráðuneytinu, hefur stutt hjálparstarf í landinu bæði með fjárframlögum og með því að senda þangað sendifulltrúa.

Átökin í Úkraínu hófust í seinna hluta febrúar á þessu ári. Síðan þá hafa þúsundir almennra borgara særst eða týnt lífi í átökunum og heimili og innviðir eyðilagst í loftárásum og sprengingum. Íbúar á átakasvæðum glíma við skort á vatni og rafmagni og eiga í erfiðleikum með að þola veturinn þar sem fjármagn skortir til viðgerða á heimilum, til kaupa á eldsneyti til upphitunar sem og fyrir vetrarfatnaði, auk þess sem innviðir landsins hafa víða verið lagðir í rúst.

Mikill skortur á grunnþjónustu

Mikill matarskortur er á ákveðnum svæðum innan Úkraínu og skortur er fyrirséður annars staðar þar sem aðfangakeðjur hafa rofnað og verslanir geta því ekki haldið uppi fullri þjónustu. Verst er ástandið í Mariupol, þar sem matvæli og vatn bráðvantar. Rauði krossinn hefur gert sitt besta við að greiða fyrir öruggum flutningi fólks þaðan og koma þangað vistum.

Á mörgum svæðum býr fólk einnig við skert aðgengi að heilbrigðisþjónustu þar sem heilbrigðisstofnanir eiga í erfiðleikum með að halda uppi starfsemi vegna takmarkaðra aðfanga og gríðarlegs álags. Ástandið hefur sérstaklega slæm áhrif á fólk sem þarf á heilbrigðisaðstoð að halda vegna langvinnra sjúkdóma og vegna fötlunar.

Milljónir einstaklinga sem hafa flúið átakasvæðin eru á vergangi innan Úkraínu eða hafa flúið til nágrannaríkja. Margir hafa ekki efni á mat og annarri nauðsynjavöru eða heilbrigðisþjónustu. Gistifjölskyldur sem hýsa fólk á flótta hafa takmarkaða getu til að aðstoða flóttafólk þar sem efnahagslegar aðstæður þeirra eru orðnar mjög bágbornar og voru jafnvel ekki góðar fyrir. Margir íbúar hafa heldur ekki tök á að yfirgefa átakasvæði vegna takmarkaðra samgangna eða líkamlegra eða andlegra veikinda.

Starfsfólk Rauða krossins sinnir hjálparstarfi í Donbas í Úkraínu.

Alþjóðaráð Rauða krossins hefur, eftir bestu getu, greitt fyrir öruggum brottflutningi almennra borgara með viðræðum við deiluaðila. Slíkt er hægt í krafti hlutleysis Rauða krossins. En Rauði krossinn hefur fleiri hlutverk á tímum átaka og reynir m.a. að tryggja virkni nauðsynlegra innviða í landinu með því að styðja við sjúkrahús og heilsugæslur í landinu sem og að halda vatns- og rafmagnsveitum gangandi. Einnig sinnir Rauði krossinn dreifingu matvæla og vatns og sér um aðhlynningu fólks sem hefur þurft að koma sér fyrir í neðanjarðarbyrgjum af ótta við loftárásir.

Stuðningur skiptir sköpum

Þörf fyrir mannúðaraðstoð í Úkraínu er meiri að umfangi en við höfum séð í Evrópu í áratugi og á ástandið því miður líklega eftir að versna enn frekar áður en það batnar og uppbygging getur hafist. Sérstaða Rauða krossins sem hlutlauss og óhlutdrægs aðila og verndara Genfarsamninganna veitir hreyfingunni einstakt aðgengi sem fáir ef nokkur annar hefur á átakasvæðum. Þess vegna skiptir starf Rauða krossins í Úkraínu og nágrannaríkjum mjög miklu máli.

Rauði krossinn á Íslandi hefur þegar sent tíu sendifulltrúa á vettvang til stuðnings mannúðarstarfi Rauða krossins í Úkraínu og alþjóða Rauða krossins. Rauði krossinn á Íslandi hefur einnig stutt mannúðarstarf í Úkraínu með beinum fjárframlögum og hefur varið alls um 150 milljónum króna til hjálparstarfs í landinu og í nágrannaríkjum í formi fjárstuðnings og með framlagi sendifulltrúa.

Mörg þúsund sjálfboðaliðar hafa bæst í hóp þeirra þrjú þúsund sem störfuðu með Rauða krossinum í Úkraínu áður er átökin hófust. Í dag starfa um sex þúsund sjálfboðaliðar með hreyfingunni og sinna lífsbjargandi mannúðaraðstoð fyrir samborgara sína, með dyggum stuðningi Alþjóða Rauða krossins.

Álag á sjálfboðaliða Rauða krossins í Úkraínu sem koma samborgurum sínum til hjálpar er gríðarlegt. Þeir eru líka þolendur en bjóða sig fram og sinna mjög óeigingjörnu, krefjandi, erfiðu og oft hættulegu hjálparstarfi. Þeim til stuðnings er öflug hreyfing Rauða krossins og Rauða hálfmánans sem stendur saman sem ein heild. Því skiptir stuðningur við mannúðarstarf Rauða krossins sköpum fyrir íbúa Úkraínu.

------

Hægt er að styðja við mannúðarstarf í Úkraínu með því að gerast Mannvinur hér.