Frú Ragnheiður: Skaðaminnkun
Frú Ragnheiður vinnur eftir hugmyndafræði skaðaminnkunar þar sem lögð er áhersla á að fyrirbyggja þann skaða og þá áhættu sem hljótast af notkun vímuefna fremur en að fyrirbyggja notkunina sjálfa. Frú Ragnheiður hefur það að markmiði að koma í veg fyrir ótímabær dauðsföll og óafturkræfan skaða sem og að auka lífsgæði og bæta heilsufar einstaklinga sem nota vímuefni í æð með því að veita lágþröskuldaþjónustu í nærumhverfi einstaklinga. Lækkun á tíðni sýkinga og útbreiðslu smitsjúkdóma á borð við HIV og lifrarbólgu C, færri dauðsföll af völdum ofskömmtunar, ábyrgari neysluhegðun og minna af notuðum sprautubúnaði í almenningsrýmum eru á meðal þess ávinnings sem hlýst af verkefninu án mikils tilkostnaðar.
Algengar spurningar og svör
Bíllinn ekur á höfuðborgarsvæðinu, Suðurnesjum og á Akureyri.
Höfuðborgarsvæðið: Sunnudaga til föstudaga (öll kvöld nema laugardaga) klukkan 18:00-21:00. Til að hitta bílinn er hægt að hringja í síma 788-7123 eða senda skilaboð á Facebooksíðu Frú Ragnheiðar.
Á dagtíma sinna starfskonur á höfuðborgarsvæðinu eftirfylgd með málum skjólstæðinga. Þær aðstoða skjólstæðinga við að koma málum sínum í réttan farveg og veita aðstoð við að komast í sértækari heilbrigðisþjónustu, í vímuefnameðferðir og í félagslega þjónustu.
Á Suðurnesjum er hún á ferðinni á mánudögum og fimmtudögum frá kl. 20-22. Síminn er 783-4747. Frú Ragnheiður á Suðurnesjum á Facebook.
Á Akureyri er ekið á mánudögum, miðvikudögum og fimmtudögum frá kl. 20-22. Síminn er 800-1150. Ungfrú Ragnheiður á Facebook.
Nálaskiptaþjónusta, boðið er upp á búnað og hreinlætisvörur fyrir notkun vímuefna um æð og tekið á móti notuðum búnaði.
Heilbrigðisþjónusta, m.a. aðhlynning sára, sýklalyfjameðferð, umbúðaskipti, saumataka og almenn heilsufarsskoðun og ráðgjöf. Á hverri vakt starfar hjúkrunarfræðingur og læknir sem sinnir bakvakt.
Sálrænn stuðningur og ráðgjöf, t.d. aðstoð við að komast í sértækari heilbrigðisþjónustu, í vímuefnameðferðir og í félagslega þjónustu.
Í Frú Ragnheiði er hægt að nálgast hlý föt, næringu, svefnpoka, tjalddýnur
Öll geta leitað til Frú Ragnheiðar. Verkefnið hefur þann tilgang að ná til jaðarsettra hópa í samfélaginu eins og húsnæðislausra einstaklinga og einstaklinga sem nota vímuefni um æð og bjóða þeim skaðaminnkandi þjónustu í formi heilbrigðisþjónustu og nálaskiptiþjónustu.
Frú Ragnheiður lofar 100% trúnaði og nafnleynd. Við leggjum mikla áherslu á að koma fram við fólk af virðingu, skilningi og væntumþykju.
Í Frú Ragnheiði á höfuðborgarsvæðinu starfa rúmlega 100 sjálfboðaliðar. Verkefnið byggir á sjálfboðnu starfi fjölbreytts hóps einstaklinga sem standa að meðaltali tvær vaktir í mánuði og skuldbinda sig í að lágmarki eitt ár. Stærsti einstaki faghópurinn eru hjúkrunarfræðingar, jafnframt eru læknar, félagsráðgjafar, lyfjafræðingar, sálfræðingar og aðrir reynslumiklir einstaklingar hluti af verkefninu. Allir sjálfboðaliðar sækja námskeið og fara í gegnum þjálfum til að geta veitt þjónustu í Frú Ragnheiðar bílnum. Aldurviðmið er 24 ár.
Tölfræði Frú Ragnheiðar á höfuðborgarsvæðinu fyrir árið 2022
Frú Ragnheiðar bíllinn er sérinnréttaður til að veita þjónustu á vettvangi. Tekið er á móti notuðum sprautubúnaði til förgunar í samstarfi við Landspítalann, sem er hluti af samfélagslegri skaðaminnkun til að draga úr notuðum sprautubúnaði sem verður eftir á götum borgarinnar eða í ruslinu.
Viltu verða sjálfboðaliði í verkefninu?
Við leitum að sjálfboðaliðum 24 ára og eldri sem hafa heilbrigðismenntun og/eða brennandi áhuga á skaðaminnkun. Í dag er biðlisti fyrir sjálfboðaliða.
Ylja: Færanlegt neyslurými
Neyslurýmið Ylja var skaðaminnkandi úrræði þar sem þau sem nota vímuefni í æð gátu komið og notað efnin í öruggu rými undir leiðsögn frá heilbrigðismenntuðum aðila. Með þessu var reynt að koma í veg fyrir hættu á ofskömmtun og sýkingum. Neyslurýmið var starfrækt frá því í mars 2022 til mars 2023, en vonir standa til að það liggi einungis í dvala um þessar mundir.
Ylja var færanlegt neyslurými og fyrsta neyslurýmið til að opna á Íslandi. Neyslurými er lagalega verndað umhverfi þar sem notendur 18 ára og eldri geta sprautað ávana- og fíkniefnum í æð undir eftirliti sérhæfð starfsfólks og gætt er fyllsta hreinlætis, öryggis og sýkingavarna. Neyslurými eru starfrækt víða um heim og hafa mikinn samfélagslegan ávinning í för með sér.
Ylja vann eftir hugmyndafræði skaðaminnkunar sem felur í sér að fyrirbyggja þann skaða og þá áhættu sem hljótast af notkun vímuefna fremur en að fyrirbyggja notkunina sjálfa. Með því að veita öruggan og hreinan stað til að neyta vímuefna er hægt að tryggja bætt öryggi til notenda sem og samfélagsins. Markmið Ylju voru því að lágmarka þörf einstaklinga til að neyta vímuefna á almannafæri og þannig koma í veg fyrir þann skaða sem vímuefnaneysla í óöruggum aðstæðum getur haft í för með sér. Má þar nefna sýkingar, blóðborna smitsjúkdóma og ofskammtanir. Ylja lagði einnig áherslu á að mynda traust, veita stuðning og viðhalda mannlegri reisn hjá notendum úrræðisins.
Algengar spurningar og svör
Neyslurýmið Ylja var starfrækt frá því í mars 2022 til mars 2023, en vonir standa til að það liggi einungis í dvala um þessar mundir.
Ráðgjöf
Starfsfólk Ylju veitti skaðaminnkandi ráðgjöf varðandi vímuefnanotkun eftir bestu getu ásamt því að grípa inn í lífsógnandi aðstæður.
Búnaður
Ylja bauð upp á hreinan búnað fyrir notkun vímuefna í æð og tók á móti notuðum búnaði. Ylja var þó ekki með búnað í sama magni og Frú Ragnheiður og hvetjum við því notendur að nýta sér þjónustu þeirra á kvöldin.
Heilbrigðisþjónusta
Í Ylju var alltaf heilbrigðisstarfsmaður á vakt sem gat veitt lágmarks heilbrigðisþjónustu, veitt ráðgjöf, bent notendum áfram á frekari þjónustu og gripið inn í lífsógnandi aðstæður.
Sálrænn stuðningur og ráðgjöf
Starfsfólk Ylju sinnti sálrænum stuðningi ásamt því að benda notendum á frekari þjónustu ef við á.
Öll gátu leitað til Ylju sem vildu ráðgjöf og öruggt skjól til að neyta vímuefna.
Ylja lofar 100% trúnaði og nafnleynd. Við leggjum mikla áherslu á að koma fram við fólk af virðingu, skilningi og væntumþykju.
