Almennar fréttir

100 ár af samhjálp og þrautseigju

Frá fyrstu dögum hefur Rauði krossinn staðið vaktina í íslensku samfélagi. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land. 

Frá sjúkrakössum til alþjóðlegrar hjálpar

Á þessum 100 árum hefur starfsemi félagsins tekið miklum breytingum. Hvað sem líður tækniframförum og samfélagsbreytingum hefur kjarninn alltaf verið sá sami: að hjálpa þeim sem mest þurfa. Verkefni Rauða krossins á Íslandi spanna allt frá skyndihjálp og fræðslu til stuðnings við flóttafólk og neyðarviðbragða á alþjóðlegum vettvangi. 

Á síðustu áratugum hefur félagið einnig gegnt lykilhlutverki í alþjóðlegri mannúðarhjálp, með stuðningi við hamfarasvæði, stríðshrjáðar þjóðir og þróunarsamvinnu víða um heim. 

Afmælisárið – Hátíð og framtíðarsýn

Í tilefni af 100 ára afmælinu stendur Rauði krossinn fyrir fjölbreyttri dagskrá á afmælisdeginum og fram eftir árinu. Í dag fer fram hátíðleg athöfn í Hörpu með tónlist, erindum og veitingum. 

,,100 ár eru aðeins upphafið"

,,Við erum óendanlega stolt af því sem Rauði krossinn hefur afrekað á síðustu 100 árum, en jafnframt vitum við að verkefnin eru aðeins rétt að byrja,“ segir Silja Bára R. Ómarsdóttir, formaður Rauða krossins á Íslandi. „Með áframhaldandi stuðningi sjálfboðaliða, stuðningsaðila og íslensks samfélags getum við haldið áfram að vera ljós í myrkrinu fyrir þá sem þurfa á okkur að halda."