Almennar fréttir
Samningur við stjórnvöld um fræðslu í tengslum við menningarnæmi og fjölmenningu
04. janúar 2023

Rauði krossinn á Íslandi og félags- og vinnumarkaðsráðuneytið undirrituðu í dag samning um fræðslu um menningarnæmi og fjölmenningu fyrir þjónustu- og viðbragðsaðila sem sinna þolendum og gerendum ofbeldis af erlendum uppruna.
Töluverð áskorun hefur verið að ná til innflytjenda sem eru fórnarlömb ofbeldis og benda tölur til þess að þolendur ofbeldis af erlendum uppruna sæki sér síður aðstoð en aðrir. Mikilvægt er að þau sem þjónustuna veita geri sér góða grein fyrir því hvernig best er að nálgast bæði þolendur og gerendur með ólíkan menningarbakgrunn. Menningarnæmi og þekking á fjölmenningu er því mikilvæg öllum þeim sem vinna með innflytjendum.
Rauði krossinn hefur rekið ýmis brautryðjendaverkefni í þágu innflytjenda hér á landi og sinnt öflugu starfi með flóttafólki frá árinu 1956. Þá gegnir félagið stoðhlutverki við stjórnvöld í samræmi við lög nr. 115/2014.
„Við erum spennt að leggja okkar lóð á vogarskálarnar í baráttunni gegn ofbeldi og teljum að reynsla okkar og þekking nýtist vel þeim þjónustu- og viðbragðsaðilum sem sinna þolendum og gerendum ofbeldis,“ segir Silja Bára Ómarsdóttir formaður Rauða krossins.
„Vegna þess trausts sem Rauði krossinn nýtur, bæði meðal nýrra íbúa sem og þeirra sem þegar búa hér, nálgast innflytjendur félagið oft með mjög viðkvæm og persónuleg málefni. Flóttafólk og innflytjendur koma oft og tíðum frá svæðum þar sem traust til stjórnvalda er takmarkað og hefur Rauði krossinn lagt á það áherslu að kynna þjónustu hins opinbera og byggja brú á milli stjórnvalda og þeirra sem hafa nýlega sest að á Íslandi með það að markmiði að auka traust á stjórnvöldum og kynna þau úrræði sem standa innflytjendum til boða,” segir Silja Bára og bætir við að það sé í samræmi við markmið stefnu Rauða krossins um opið, fjölbreytt og friðsælt samfélag sem byggir á samfélagslegri þátttöku, jöfnun tækifærum og samheldni.
Fréttir af starfinu
Fréttayfirlit
„Við verðum að brýna raustina“
Almennar fréttir 13. maí 2025„Á tímum sem þessum getum við ekki staðið þögul hjá,“ segir Silja Bára R. Ómarsdóttir, formaður Rauða krossins á Íslandi. „Við verðum að brýna raustina og láta í okkur heyra, hvar sem færi gefst.“

Neyðarsjúkrahúsið: Líflína þúsunda í heilt ár
Alþjóðastarf 09. maí 2025Fjórir Íslendingar hafa starfað um tíma á neyðarsjúkrahúsi Rauða krossins í Rafah á Gaza frá opnun þess fyrir ári. Þörfin fyrir þetta bráðabirgðaúrræði er enn gríðarleg. Þar er alvarlega særðu og veiku fólki sinnt undir drunum frá sprengjuregni í nágrenninu.

Vertu klár á táknmáli
Innanlandsstarf 09. maí 2025Auglýsingar í hinni vinsælu vitundarvakningu Rauða krossins 3dagar.is, þar sem fólk er hvatt til að undirbúa sig fyrir neyðarástand, eru nú líka á táknmáli.