Innanlandsstarf
Tæplega 8.5 milljónir króna söfnuðust á Öll sem eitt tónleikunum
21. júní 2024
Þann 7. maí síðastliðinn fóru samstöðutónleikarnir Öll sem eitt fram í Háskólabíó, en markmið tónleikanna var að sýna samstöðu með þolendum átakanna í Gaza og safna fé til að styrkja hjálparstarf þar. Á tónleikunum kom fram fjöldinn allur af frábæru íslensku tónlistarfólki fyrir framan fullan sal af gestum, en auk þessu gátu áhorfendur heima í stofu fylgst með tónleikunum í beinni útsendingu á Stöð 2.
Allur ágóði miðasölunnar rann beint til Rauða krossins og UNICEF á Íslandi, en fólk hafði einnig kost á að styrkja söfnunina í gegnum sérstaka söfnunarsíðu og söfnunarnúmer.
Alls söfnuðust 8.477.402 kr. og skiptist það fé jafnt á milli Rauða krossins og UNICEF á Íslandi.
Rauði krossinn á Íslandi styrkir palestínska Rauða hálfmánann
Söfnunarféð sem fór til Rauða krossins á Íslandi verður sent til palestínska Rauða hálfmánans, sem er hluti af hinni alþjóðlegu hreyfingu Rauða krossins og Rauða hálfmánans. Félagið hefur áratugum saman gegnt veigamiklu hlutverki í Palestínu sem ein helstu mannúðarsamtök á svæðinu.
Frá 7. október síðastliðnum hefur palestínski Rauði hálfmáninn sinnt stórfelldu hjálparstarfi á Gaza. Félagið veitir læknisþjónustu, sér um sjúkraflutninga, dreifir mat og vatni og vinnur að bættri hreinlætisaðstöðu og húsaskjóli fyrir flóttafólk. Auk þess stuðlar það að bættu aðgengi að lyfjum og veitir bæði fjárhagsaðstoð og sálfélagslegan stuðning. Félagið vinnur einnig náið með öðrum aðilum sem sinna hjálparstarfi til að tryggja að sem flest þeirra sem þurfa mest á hjálp að halda fái nauðsynlegan stuðning. Með því að styðja félagið nýtist féð sem best þar sem þörfin er mest.
UNICEF á Íslandi styrkir hjálparstarf UNICEF í Palestínu
Söfnunarfé til UNICEF á Íslandi rennur í neyðaraðgerðir samtakanna á Gaza. UNICEF, Barnahjálp Sameinuðu þjóðanna, hefur verið í Palestínu í meira en 4 áratugi og hefur sinnt hjálparstarfi á Gaza frá því að árásir hófust. Þrátt fyrir ótal hindranir og árásir á hjálparstarfólk og heilbrigðisstarfsfólk þá hafa UNICEF og samstarfsaðilar náð að hjálpa þúsundum barna á Gaza á síðustu mánuðum, meðal annars með mat, beinni fjárhagsaðstoð, hreinu vatni, hlýjum vetrarfatnaði og læknisaðstoð og hitakössum fyrir fyrirbura.
Frá því að árásir hófust hafa UNICEF og Rauði krossinn ítrekað kallað eftir vopnahléi, að fleiri inngönguleiðir verði tryggðar sem gerir hjálparsamtökum kleift að flytja hjálpargögn inn á Gaza og að alþjóðalög séu virt. Hver dagur sem líður án vopnahlés og aðgengi að mannúðaraðstoð kostar börn og fjölskyldur lífið á Gaza.
Stuðningur í verki
Bæði Rauði krossinn og UNICEF á Íslandi vilja þakka Elísabetu Eyþórsdóttur og Ellen Kristjánsdóttur kærlega fyrir að standa að þessum vönduðu tónleikum. Þær áttu frumkvæðið af þessari fallegu kvöldstund þar sem fólk fékk tækifæri til að koma saman og sýna þolendum átakanna í Palestínu stuðning í verki.
Átökin fyrir botni Miðjarðarhafs hafa nú staðið yfir í rúmlega átta mánuði og bitnað á gríðarlegum fjölda fólks, en ástandið er allra verst á Gaza.
Fréttir af starfinu
Fréttayfirlit
Coca-Cola og Rauði krossinn hjálpa umsækjendum um alþjóðlega vernd að aðlagast íslensku samfélagi
Innanlandsstarf 25. september 2024Coca-Cola Europacific Partners(CCEP) á Íslandi og Rauði krossinn á Íslandi hafa undirritað samstarfssamning um nýtt verkefni sem kallast „Lyklar að íslensku samfélagi – The Keys to Society“ og miðar að því að styðja og valdefla umsækjendur um alþjóðlega vernd.
Frábær fyrsti mánuður í neyslurými Rauða krossins
Innanlandsstarf 13. september 2024Ylja – Neyslurými Rauða krossins hefur nú verið starfrækt í Borgartúni einn mánuð. Verkefnið hefur farið mjög vel af stað þennan fyrsta mánuð, ekkert óvænt hefur komið upp á og skjólstæðingar sem nýta þjónustuna lýsa mikilli ánægju með hana.
Vel heppnað málþing um málefni barna á flótta
Innanlandsstarf 03. september 2024Nýverið fór fram vel heppnað málþing um áskoranir barna á flótta í íslensku skólakerfi, en nýtt fræðsluefni um málaflokkinn var að koma út. Á þinginu kom fram hve mikilvægt er að börnin fái góðar móttökur og að þó að mikill árangur hafi náðst á þessu sviði sé enn mikið verk fyrir höndum.