Almennar fréttir
100 ára afmælishátíð Rauða krossins í Hörpu
20. desember 2024
Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.

Um 400 gestir sóttu fundinn, sem haldinn var í salnum Norðurljósum. Frú Halla Tómasdóttir forseti Íslands og Bjarni Benediktsson forsætisráðherra ávörpuðu fundinn. Bæði þökkuðu þau félaginu fyrir margvíslegt framlag til heilbrigðis- og velferðarþjónustu landsins og almannavarna.
Birgitte Bischoff Ebbesen, yfirmaður Evrópuskrifstofu Alþjóðasambands Rauða krossins og Rauða hálfmánans hélt tölu um framlag Rauða krossins á Íslandi til alþjóðastarfs hreyfingarinnar. Þar tiltók hún sérstaklega sendifulltrúa og fjárstuðning félagsins við björgunarskip sem Rauði krossinn heldur úti á Miðjarðarhafi fyrir flóttafólk. Þrátt fyrir smæð hefur Rauði krossinn á Íslandi verið í forystu við að tryggja fjárhagslegan grunn og starfsfólk fyrir þessa þjónustu, með mikilvægum stuðningi utanríkisráðuneytisins.
Silja Bára R. Ómarsdóttir formaður Rauða krossins á Íslandi hélt sömuleiðis ávarp. Í erindi sínu vék hún að ýmsum nýjum áskorunum sem blasa við með aukinni hörku í heimspólitíkinni. Rauði krossinn þarf að vera meðvitaður um breytta stöðu og að félagið hefur hlutverki og skyldum að gegna.
Þá voru haldin nokkur stutt erindi um grundvallarhugsjónir Rauða krossins og hvernig þær fléttast inn í allt starf félagsins á Íslandi og um heim allan.
Hljómsveitin Ylja, skemmtikrafturinn Ari Eldjárn, Skólakór Kársness og félagar í Tónlistarvinum Rauða krossins veittu fundinum hátíðlegt, fallegt og skemmtilegt yfirbragð.
Öllum gestum og því fólki sem lagði hönd á plóg er þakkað fyrir daginn, sem var félaginu til mikils sóma.










Fréttir af starfinu
Fréttayfirlit
Fjármögnun neyslurýma áskorun um alla Evrópu
Innanlandsstarf 25. júní 2025Þrátt fyrir að neyslurými fyrir vímuefni hafi fyllilega sannað gildi sitt gagnvart bæði einstaklingum og samfélögum glíma þau við sama vandamálið, hvort sem þau eru í Barcelona eða Borgartúni. Starfsfólk skaðaminnkunarverkefna Rauða krossins sótti upplýsandi ráðstefnu í Strassborg.

Nýtt forvarnarátak: Öryggi barna í sundi
Innanlandsstarf 23. júní 2025„Drukknun er algengari en flestir halda og stundum er því talað um hinn þögla faraldur,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. Félagið hefur hleypt af stokkunum fræðslu- og forvarnarátaki um öryggi barna í sundi í samvinnu við Reykjavíkurborg og Samtök forstöðumanna sundstaða á Íslandi.

Sigríður tekur við formennsku af Silju Báru
Almennar fréttir 19. júní 2025„Ég tek við starfi formanns með mikilli auðmýkt, tilhlökkun og virðingu fyrir öllum þeim sem starfa fyrir Rauða krossinn, bæði sjálfboðaliðum og starfsfólki,“ segir Sigríður Stefánsdóttir, nýr formaður Rauða krossins á Íslandi.