Almennar fréttir
Fyrrum nemandi Jafnréttisháskólans veitir Rauða krossinum ráðgjöf
24. júní 2019
Undanfarnar vikur hefur Rauði krossinn notið liðsinnis hinnar palestínsku Jolene Zaghloul.
Undanfarnar vikur hefur Rauði krossinn notið liðsinnis hinnar palestínsku Jolene Zaghloul. Jolene hefur lögfræðimenntun frá Abu Dies háskólanum í Palestínu og King Mohammad the Fifth háskólanum í Marokkó. Í heimalandinu vann hún við lögfræðiráðgjöf fyrir einstaklinga sem sættu ákæru og fangelsisvist. Þá hefur hún einnig unnið að ýmsum mannréttindamálum. Árið 2012 útskrifaðist hún frá Jafnréttisháskóla Sameinuðu Þjóðanna í Reykjavík með diplóma í alþjóðlegum jafnréttisfræðum þar sem lokaverkefni hennar fjallaði um réttindi kvenna í palestínskum fangelsum. Jolene er íslenskur ríkisborgari og undanfarin ár hefur hún unnið sem verkefnisstjóri í Jafnréttishúsi með innflytjendum, hælisleitendum og flóttafólki á Íslandi.
Rauði krossinn á Íslandi og Rauði hálfmáninn í Palestínu hafa um árabil átt farsælt samstarf í langtímaþróunar- og mannúðarverkefnum. Núverandi verkefni miðar að því að skapa umhverfi sem veitir fólki í Palestínu öryggi og stuðning. Rauði krossinn leggur mikla áherslu á að efla þátttöku stúlkna í verkefninu og valdeflingu þeirra sem áhrifavaldar í samfélögum sínum. Þetta er eitt þeirra verkefna sem Jolene veitti Rauða krossinum ráðgjöf við. Þá veiti hún lögfræðingum og öðru starfsfólki Rauða krossins stuðning í vinnu þeirra fyrir hælisleitendur og málsvarastarfi fyrir flóttafólk á Íslandi.
Rauði krossinn og Jafnréttisháskóli Sameinuðu þjóðanna undirrituðu samstarfsyfirlýsingu í nóvember á síðasta ári. Meðal markmiða samstarfsyfirlýsingarinnar er byggja upp og efla samstarf Rauða krossins við nemendur sem koma af sameiginlegum áherslusvæðum Jafnréttisháskólans og Rauða krossins.
„Það er mikill fengur fyrir Rauða krossinn að fá tækifæri til að vinna með reynslumiklum sérfræðingi sem hefur þessa sérstöku innsýn eftir að hafa búið á því átakasvæði sem Palestína er og við í Rauða krossinum höfum unnið á undanfarna áratugi.“ segir Guðný Nielsen á Hjálpar- og mannúðarsviði Rauða krossins.
„Jafnréttisháskóla Sameinuðu þjóðanna í Reykjavík sækja framúrskarandi einstaklingar víða að og það skapar einstakt tækifæri fyrir íslensk borgarasamtök, sem mörg hver sinna þróunar- og mannúðaraðstoð í þeirra heimalöndum, til að fá þeirra innsýn. Þá leggjum við í Rauða krossinum lykiláherslu á jafnrétti kynjanna og valdeflingu kvenna í okkar alþjóðastarfi og aðgengi að nemendum Jafnréttisháskólans gefur tækifæri fyrir mikil samlegðaráhrif.“
Fréttir af starfinu
Fréttayfirlit
Rauði krossinn fjölgar fatakössum á höfuðborgarsvæðinu
Almennar fréttir 18. nóvember 2025Nýjum söfnunarkössum Rauða krossins fyrir fatnað og annan textíl hefur verið komið fyrir við fimm Bónusverslanir á höfuðborgarsvæðinu. Samtals eru kassarnir því á sjö stöðum á svæðinu og stefnt er á frekari útbreiðslu á næstu misserum.
Samstaða sómalskra kvenna drifkraftur umbóta
Alþjóðastarf 06. nóvember 2025„Þrátt fyrir takmörkuð úrræði deila sómalskar konur þeirri öflugu hugsjón að konur séu konum bestar,“ segir Natalia Herrera Eslava, verkefnastjóri hjá Rauða krossinum á Íslandi. Starf sómalska Rauða hálfmánans, sem Rauði krossinn á Íslandi styrkir, er mikilvægara nú en nokkru sinni.
Auglýsing um sögu Rauða krossins tilnefnd til verðlauna
Almennar fréttir 05. nóvember 2025„Saga Rauða krossins á Íslandi er löng og litrík og við lögðum mikla vinnu í að fanga rétta tilfinningu,“ segir hönnunarstjóri Strik Studio um tilnefningu til verðlauna á einni stærstu hönnunarhátíð Evrópu.