Alþjóðastarf
Þörf á tafarlausum pólitískum aðgerðum
18. september 2025
„Öll ríki verða að leggja sín þyngstu lóð á vogarskálarnar svo koma megi á vopnahléi strax,“ segir Gísli Rafn Ólafsson, framkvæmdastjóri Rauða krossins á Íslandi. „Við höfum ekki lengri tíma. Þetta er lokaviðvörun til stjórnvalda. Núna verður að bregðast við.“
„Nauðungarflutningar frá Gaza-borg eru hreinasta kvalræði fyrir hundruð þúsunda fólks sem er þegar sært á líkama og sál,“ segir Gísli Rafn Ólafsson, framkvæmdastjóri Rauða krossins á Íslandi. Að þvinga fólk á flótta frá suðri til norðurs auki enn á hörmungarástandið á Gaza og brjóti í bága við þær reglur sem þjóðir heims hafa sammælst um að skuli gilda í stríði. „Alþjóðleg mannúðarlög voru sett til að draga úr þjáningum almennra borgara í vopnuðum átökum,“ segir Gísli. „Þeim ber að fylgja og afleiðingar hljótast af brotum á þeim.“
Á hverjum einasta degi eru almennir borgarar á Gaza drepnir, börn sem fullorðnir. Þau sem lifa af eru flæmd á brott með valdi og hrekjast milli staða í leit að öryggi sem hvergi er að finna. Ráðist er á sjúkrahús og heilbrigðis- og mannúðarstarfsfólk eru sömuleiðis skotmörk. Miklar takmarkanir eru á flutningi mannúðaraðstoðar inn á Gaza sem og dreifingu hjálpargagna til fólksins. Það ríkir hungursneyð.
„Við þurfum tafarlausar pólitískar aðgerðir til að draga úr þjáningum almennra borgara á Gaza – fólksins sem hefur þurft að þola ólýsanlegan hrylling upp á hvern einasta dag í að verða tvö ár,“ segir Gísli. „Öll ríki verða að leggja sín þyngstu lóð á vogarskálarnar svo koma megi á vopnahléi strax. Við höfum ekki lengri tíma. Þetta er lokaviðvörun til stjórnvalda. Núna verður að bregðast við.“
Fréttir af starfinu
Fréttayfirlit
„Við viljum hjálpa börnum og bara öllum“
Almennar fréttir 29. október 2025Þrír níu ára gamlir vinir úr Kársnesinu í Kópavogi gengu í hús og báðu um hluti til að selja á tombólu. Þannig söfnuðu þeir 8.571 krónu fyrir Rauða krossinn.
Hvetja vinnustaði til að bjóða upp á skyndihjálparnámskeið
Innanlandsstarf 27. október 2025„Skyndihjálparnámskeið ættu auðvitað að vera hluti af öryggismenningu allra vinnustaða að okkar mati,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. Á skyndihjálparnámskeiðum öðlast fólk þjálfun og færni í að bregðast hratt, rétt og örugglega við í óvæntum og erfiðum aðstæðum.
Fólkið á Gaza þolir enga bið eftir aðstoð
Alþjóðastarf 21. október 2025Um 150 flutningabílar komast nú flesta daga inn á Gaza með mannúðaraðstoð. Þeir þyrftu að vera margfalt fleiri. Vopnahléð hefur ekki fært fólkinu fullkominn frið, segir framkvæmdastjóri Rauða krossins, en opnað mikilvægan glugga til að ná til þess og hann verður að nýta.