Í haust verða gerðar breytingar á stuðningi Rauða krossins við Grindvíkinga sem þurftu að rýma heimili sín vegna jarðhræringanna 10. nóvember 2023. Þann 1. september næstkomandi verður hætt að taka við umsóknum í styrktarsjóðinn Þrótt Grindvíkinga sem Rauði krossinn stofnaði til á síðasta ári. Var ákvörðun um þetta tekin á fundi úthlutunarnefndar sjóðsins í lok júlí.

Áfram verður stutt við Grindvíkinga við að aðlagast nýjum veruleika með fræðslu og stuðningsnámskeiðum. Verður fyrirkomulag þess stuðnings kynnt á næstu vikum. Einnig verður áfram lögð áhersla á að efla viðnámsþrótt allra íbúa á Suðurnesjum.

Rauði krossinn fékk haustið 2024 styrk frá fyrirtækinu Rio Tinto til að styðja við samfélagið sem þurfti að flytja vegna hamfaranna og til að efla seiglu á Suðurnesjum öllum. Rauði krossinn setti í kjölfarið styrktarsjóðinn Þrótt Grindvíkinga á fót með það að markmiði að efla seiglu Grindvíkinga sérstaklega.

Frá stofnun hefur sjóðurinn gegnt mikilvægu hlutverki í að styðja fjölbreytt verkefni í þágu Grindvíkinga, með sérstakri áherslu á stuðning, virkni og samveru, einkum meðal ungs fólks og eldri borgara.

Á þeim tíma sem sjóðurinn hefur verði starfræktur hefur 21 umsókn um styrk borist. Áfram verður tekið við umsóknum í sjóðinn til 1. september næstkomandi.

Það er von Rauða krossins að stuðningur sjóðsins hafi stuðlað að jákvæðum breytingum og eflt trú einstaklinga á eigin getu.

Rauði krossinn færir öllum umsækjendum, samstarfsaðilum og öðrum sínar innilegustu þakkir fyrir traust, þátttöku og elju á undanförnum mánuðum.