Innanlandsstarf
Vetrarstarfið að komast á fullt skrið
25. ágúst 2019
Nú er starfsemi Rauða krossins í Hafnarfirði og Garðabæ að komast á fullt eftir sumarfrí. Helstu verkefnin í vetur verða: félagsstarf fyrir umsækjendur um alþjóðlega vernd, námsaðstoð, heimsóknavinir, föt sem framlag, Tækifæri, Karlar í skúrum og skyndihjálparnámskeið.
Helstu verkefnin eru:
Félagsstarf fyrir umsækjendur um alþjóðlega vernd
Deildin sér um félagsstarf fyrir hælisleitendur á öllu höfuðborgarsvæðinu og í Reykjanesbæ og skipuleggur í samvinnu við sjálfboðaliða og hælisleitendur margvíslega viðburði eins og opið hús, konumorgna, tungumálakennslu og heimsóknir.
Námsaðstoð er í boði einu sinni í viku á bókasafninu í Hafnarfirði og Garðabæ og í Hvaleyrarskóla. Sjálfboðaliðar aðstoða við námið. Stefnt er að fjölgun á tímum í námsaðstoð ef fleiri sjálfboðaliðar bjóða sig fram.
Heimsóknavinir
Félagsleg einangrun er algengari en marga grunar. Heimsóknavinir Rauða krossins heimsækja fólk á einkaheimili, sambýli, dvalarheimili og stofnanir með það markmið að rjúfa félagslega einangrun.
Föt sem framlag
Föt sem framlag prjónahópar eru vikulega í Hafnarfirði og einu sinni í mánuði í Garðabæ. Hópurinn prjónar peysur, húfur, vettlinga, teppi og fleira og gefur til þeirra sem á þurfa að halda í nærsamfélaginu.
Karlar í skúrum
Þar hafa karlar möguleika á að hittast, spjalla og vinna að ýmsum sameiginlegum verkefnum sem þeir sjálfir ákveða.
Tækifæri
Tækifæri er fyrir einstaklinga yngri en 30 ára sem af einhverjum ástæðum eru ekki á vinnumarkaði eða í námi. Verkefnið byggir á að hver einstaklingur setji sér markmið og leitist við að ná þeim. Verkefnið er ætlað að auka sjálfstraust og valdefla þátttakendur og koma í veg fyrir félagslega einangrun.
Hjá deildinni eru einnig haldin ýmis námskeið, svo sem skyndihjálparnámskeið, börn og umhverfi, námskeið í sálrænum stuðningi og fleira. Upplýsingar um námskeiðin má finna inn á skyndihjalp.is
Viltu gerast sjálfboðaliði?
Starf Rauða krossins er borið uppi af sjálfboðaliðum. Við erum alltaf að leita að fleirum til að taka þátt í verkefnunum okkar.
Hafðu samband ef þú hefur áhuga á að leggja okkur lið. Sendu okkur tölvupóst: hafnarfjordur@redcross.is eða hringdu í síma: 570 4220.
Fréttir af starfinu
Fréttayfirlit
Rafrænt HAM-námskeið fyrir Grindvíkinga
Innanlandsstarf 08. október 2025Rauði krossinn heldur áfram að bæta í verkfærakistu Grindvíkinga. Fjarnámskeið í hugrænni atferlismeðferð á vegum Framvegis – símenntunarstöðvar er nú í boði.
36 milljónir króna til mannúðarstarfs í Úkraínu
Alþjóðastarf 03. október 2025Frá því átökin í Úkraínu hófust hefur Alþjóðasamband Rauða krossins, í samstarfi við úkraínska Rauða krossinn, veitt meira en 17 milljónum einstaklinga mannúðaraðstoð. Á sama tíma hefur Rauði krossinn á Íslandi, með dyggum stuðningi utanríkisráðuneytisins, veitt rúmlega 265,8 milljónum króna til mannúðarstarfs í landinu.
Rauði krossinn neyðist til að yfirgefa Gazaborg
Alþjóðastarf 01. október 2025Fánar við skrifstofur Alþjóðaráðs Rauða krossins í Gazaborg hafa verið dregnir niður og allt starfsfólkið flutt sig til suðurhluta Gaza. Harðandi hernaðaraðgerðir leiddu til þess að þessi erfiða ákvörðun var tekin.