Undirbúningur hafði staðið um hríð sem gerði það að verkum að þegar sameiningin varð að veruleika um mitt ár gekk hún vel að sögn Óskar þótt áfram sé unnið að því að fínstilla verkferla. „Svo var það risastórt verkefni að opna neyslurýmið Ylju,“ segir Ósk. Ylju hafi verið tekið mjög vel úti í samfélaginu og þörfin á slíku úrræði verið ljós alveg frá opnun í ágúst í fyrra.

Með sameiningunni og nýjum verkefnum fjölgaði starfsmönnum sem heyrðu undir höfuðborgardeild verulega eða úr níu í tæplega fjörutíu. Að verkefnum þessarar langstærstu deildar Rauða krossins á Íslandi koma nú 624 sjálfboðaliðar.

Fyrsta ársskýrsla hinnar nýju deildar hefur nú litið dagsins ljós. Neyslurýmið Ylja og Frú Ragnheiður, fjölbreytt vinaverkefni, tungumálaþjálfun og sjálfboðaliðastarf fólks á flótta eru meðal þeirra fjölmörgu verkefna höfuðborgardeildar sem fjallað er um í ársskýrslunni. Fram kemur að skaðaminnkunarverkefnin hafi verið mikil og krefjandi á síðasta ári með enduropnun Ylju eftir langa bið í nýju húsnæði við Borgartún. Í Ylju geta notendur fíkniefna neytt þeirra í öruggu rými undir leiðsögn frá heilbrigðismenntuðum aðilum. „Móttökurnar hafa verið fram úr björtustu vonum og oft og ítrekað fullt út úr dyrum,“ skrifar Fanney Birna Jónsdóttir, formaður stjórnar höfuðborgardeildarinnar, í ávarpi sínu í ársskýrslunni. „Frú Ragnheiður hélt uppi fullri þjónustu allt árið, og hvert metið af öðru slegið í komum, förgun búnaðar og öðru og ljóst að þörfin er enn eins brýn og verið hefur.“