Í febrúar síðastliðnum urðu jarðskjálftar í Tyrklandi og Sýrlandi sem voru þeir stærstu í heila öld og ollu gríðarlegri eyðileggingu. Ljóst er að yfir 14,7 milljónir einstaklinga urðu fyrir áhrifum vegna skjálftanna, 60 þúsund manns týndu lífi og milljónir lentu á vergangi. Nú, þremur mánuðum síðar, þurfa þessir einstaklingar enn á miklum stuðningi að halda, sérstaklega fjárhagsaðstoð, eftir að hafa misst heimili sín, lífsviðurværi og allar eigur.

Heilu samfélögin, jafnvel heilu borgirnar, neyðast nú til að byrja upp á nýtt og sú vegferð er rétt að byrja. Fjölskyldur eiga líka erfitt með að jafna sig á því áfalli sem þau hafa orðið fyrir og eru margar hverjar í tímabundnu húsaskjóli sem er ekki nægilega öruggt. Því er brýn þörf fyrir áframhaldandi stuðning og fjármagn til að styðja bæði við áríðandi þarfir sem og langtíma uppbyggingu.

Það hefur skipt gríðarlega miklu máli að fá utanaðkomandi aðstoð á hamfarasvæðin og fjöldi landsfélaga Rauða krossins og Rauða hálfmánans um allan heim hafa sent neyðaraðstoð og margvísleg hjálpargögn til að styðja við björgunarstörf og bæta aðstæður þolenda.

Mörg þúsund sjálfboðaliðar og starfsmenn frá Rauða hálfmánanum í Sýrlandi og Tyrklandi hafa verið á vettvangi að styðja við þolendur skjálftanna frá fyrsta degi. Með öflugum fjárstuðningi frá alþjóðasambandi Rauða krossins hefur verið hægt að efla þjónustu þessara félaga og ná til tæplega fjögurra milljón fleiri þolenda skjálftanna en annars hefðu verið hægt.

Viðbrögð Rauða krossins á Íslandi

Rauði krossinn á Íslandi hóf neyðarsöfnun vegna jarðskjálftanna sama dag og fréttir bárust af hamförunum. Um leið og söfnunin hófst var ljóst að þessar þjáningar snertu mörg hér á landi og með framlögum almennings og fyrirtækja söfnuðust alls 23.195.963 króna sem fara beint til hamfarasvæðanna.

Rauði krossinn á Íslandi sendi 15 milljónir króna til þolenda skjálftanna í Tyrklandi fljótlega eftir að þeir áttu sér stað, en sú upphæð kom að hluta frá neyðarsöfnuninni, að hluta frá Mannvinum Rauða krossins og með stuðningi utanríkisráðuneytisins. Þessum fjárstyrk verður svo fylgt eftir með 31 milljón króna í viðbót, sem munu styðja við áframhaldandi mannúðarstarf í Sýrlandi. Ástandið þar í landi er sérlega bágborið vegna vopnaðra átaka sem hafa staðið yfir í meira en áratug með tilheyrandi eyðileggingu og mannfalli, svo skjálftarnir gerðu vont ástand verra. Því er þörfin fyrir fjárhagsaðstoð meiri þar en í Tyrklandi.

Rauði krossinn vill nota tækifærið og þakka öllum þeim sem hafa lagt hönd á plóg og stutt neyðarsöfnunina. Hver einasta króna verður nýtt í hjálparstarf á hamfarasvæðinu og mun koma að góðum notum til að mæta þeim miklu erfiðleikum sem fólkið á hamfarasvæðunum stendur frammi fyrir.

Þrátt fyrir að neyðarsöfnuninni sé lokið þýðir það alls ekki að Rauði krossinn á Íslandi sé hættur að styðja þolendur skjálftanna. Þau sem vilja styðja við hjálparstarfið í þessum ríkjum geta áfram gert það með því að gerast Mannvinir Rauða krossins hér.