Rauði krossinn á Íslandi styrkti nýverið neyðarsjúkrahús Rauða krossins á Gaza um 50 milljónir króna með stuðningi Mannvina og utanríkisráðuneytisins. Rauði krossinn hefur stutt mannúðarstarf palestínska Rauða hálfmánans og alþjóðaráðs Rauða krossins á Gaza allt frá upphafi viðbragða í árslok 2023 og hefur auk þess sent fjóra sendifulltrúa til starfa á neyðarsjúkrahúsinu.

Sjúkrahúsið var hugsað til bráðabirgða en starfar enn, sextán mánuðum eftir að því var komið á laggirnar. Það gegnir stöðugt stærra hlutverki í heilbrigðisþjónustu á Gaza því margar opinberar sjúkrastofnanir eru orðnar óstarfhæfar.

„Heilbrigðiskerfið á Gaza er hrunið,“ segir Gísli Rafn Ólafsson, framkvæmdastjóri Rauða krossins á Íslandi. „Neyðarsjúkrahús Rauða krossins er líflína þúsunda í hörmungunum miðjum.“

Þar er ekki aðeins veitt bráðaaðstoð heldur einnig mæðravernd, fæðingarhjálp og geðheilbrigðisþjónusta. Á sjúkrahúsinu, sem starfrækt er í tjaldbúðum, hafa 620 börn komið í heiminn og 8.200 skurðaðgerðir verið framkvæmdar svo dæmi séu tekin. 35 prósent allra sjúklinganna hafa verið börn. 

Álagið á starfsfólk á neyðarsjúkrahúsinu er gríðarlegt. Og aðstæðurnar sem það starfar í verða sífellt flóknari. Neyðin vex stöðugt. Aðeins litlu magni hjálpargagna er hleypt inn á Gaza og sjúkrahús sem áður tóku við sjúklingum frá neyðarsjúkrahúsinu eru ýmist með skerta starfsemi eða enga. Á síðustu vikum hafa ítrekað komið stórir hópar fólks inn á sjúkrahúsið með skotáverka, þeirra á meðal börn. Oftast er um að ræða fólk sem skotið var á er það var að sækja sér mataraðstoð. Í ofanálag ríkir nú hungursneyð á Gaza.

„Ótti við hungur, hrakningar, skot- og sprengjuárásir og annað ofbeldi veldur öllum almennum borgurum á Gaza viðvarandi angist á hverjum einasta degi,“ segir Gísli. „Hjálpar- og heilbrigðisstarfsfólk fer ekki varhluta af þessu hrikalega ástandi en heldur áfram að hætta eigin lífi fyrir aðra.“

Gísli minnir enn og aftur á að alþjóðleg mannúðarlög, sem ríki heims hafa sammælst um og ber að fylgja, eru skýr: Almennir borgarar eru ekki skotmörk. Konur og börn njóta sérstakrar verndar. Hjálpar- og heilbrigðisstarfsfólk sömuleiðis. Leyfa skal greiðan, óheftan og skjótan flutning neyðaraðstoðar til þeirra sem á þurfa að halda.

Fordæma þurfi hátt og skýrt brot á þessum lögum. „Þjóðarleiðtogar þurfa að sýna í orði og verki að þeir séu í liði með mannúðinni. Í liði með almennum borgurum á Gaza. Nú þarf að sýna dirfsku og kjark. Þessum manngerðu hörmungum verður að linna. Hver einasta mínúta án vopnahlés kostar mannslíf.“