Margfalda þarf þá aðstoð sem flutt er inn á Gaza eftir að samkomulag um vopnahlé náðist. Að sama skapi þarf breiður, alþjóðlegur stuðningur við þær miklu mannúðaraðgerðir sem þörf er að ráðast í á svæðinu að vera skýr. Opna þarf allar gáttir inn á Gaza svo að lífsnauðsynleg hjálpargögn komist þangað í nægu magni til að lina þær skelfilegu aðstæður sem almennir borgarar hafa búið við í tvö ár.

Þetta er meðal þess sem fram kemur í yfirlýsingu frá Alþjóðasambandi Rauða krossins og Rauða hálfmánans. Eftir að samkomulag um vopnahlé náðist hefur verið mögulegt að flytja meira af hjálpargögnum inn á Gaza flesta daga en mánuðina á undan. En aðstoðin er engu að síður langt frá því að uppfylla brýnustu þarfir íbúanna. Alþjóðasambandið ítrekar ákall sitt um að aðgengi með hjálpargögn að svæðinu verði tryggt og óhindrað.

Alþjóðasambandið hefur sent út neyðarkall til að fjármagna þá umfangsmiklu aðstoð sem landsfélög Rauða krossins og Rauða hálfmánans á svæðinu munu sjá um að veita fólkinu á Gaza. Enn sem komið er eru þær aðgerðir verulega vanfjármagnaðar. „Nú er rétti tíminn til að styðja við neyðarsöfnunina,“ segir í yfirlýsingu sambandsins.

Rauði krossinn á Íslandi hefur svarað þessu neyðarkalli og hafið neyðarsöfnun fyrir fólkið á Gaza. Söfnunin fór vel af stað en Gísli Rafn Ólafsson, framkvæmdastjóri félagsins, hvetur fleiri, ekki síst fyrirtæki, til að leggja henni lið. „Fólkið á Gaza þolir enga bið eftir aðstoð,“ segir hann. „Vopnahléð hefur ekki fært því fullkominn frið en það hefur opnað mikilvægan glugga til að ná til þeirra og hann verðum við í sameiningu að nýta eftir fremsta megni.“

Með því að styðja við neyðarsöfnun Rauða krossins á Íslandi leggur þú þitt af mörkum til hjálparstarfsins á Gaza. Félagar okkar á vettvangi; á Gaza, í Jórdaníu og Egyptalandi, vinna af kappi við að skipuleggja mannúðaraðgerðirnar og koma aðstoðinni til þeirra sem mest þurfa á að halda.

Palestínski Rauði hálfmáninn hefur í tvö ár sinnt lífsbjargandi starfi á Gaza. Á þeim tíma hefur 31 starfsmaður og sjálfboðaliði félagsins verið drepinn. En áfram er haldið, þótt sorgin sé mikil. Félagið rekur sjúkrahús, neyðarskýli og sjúkrabíla auk þess að styðja íbúa með margvíslegum öðrum hætti. 

Egypski Rauði hálfmáninn heldur utan um birgðastjórnun allrar aðstoðar sem flutt er frá Egyptalandi til Gaza. Þetta er risavaxið verkefni enda mestu mannúðaraðgerðir frá seinna stríði hafnar. Um 150 flutningabílar flytja nú neyðarbirgðir inn á Gaza á hverjum degi. Það er hvergi nærri nóg. Þeir þyrftu að vera 600 til að ná að anna þörfinni sem skapast hefur á svæðinu.

Jórdanski Rauði hálfmáninn er í startholunum að flytja neyðaraðstoð inn á svæðið um leið og færi gefst. Félagið hefur einnig tekið á móti sjúklingum sem fluttir hafa verið frá Gaza og undirbýr að taka við fleirum.

Hér finnur þú ýmsar leiðir sem þú eða þitt fyrirtæki getur nýtt til að leggja neyðarsöfnun Rauða krossins fyrir fólkið á Gaza lið.