Alþjóðastarf
Fyrstu viðbrögð hreyfingarinnar vegna hamfara í Marokkó
11. september 2023
Á föstudagskvöld varð öflugur jarðskjálfti í Marokkó sem kostaði þúsundir lífið og olli mikilli eyðileggingu. Rauði hálfmáninn hóf strax störf við að bregðast við þessum hörmungum.
Jarðskjálftinn var af stærðinni 6,8 og upptök hans voru á litlu dýpi í Atlasfjöllum, um 75 kílómetra suðaustur af Marrakesh. Nítján mínútum síðar varð eftirskjálfti sem var 4,9 að stærð.
Tala látinna er nú komin í tæplega 2500 manns, en það er enn ekki ljóst hve margir hafa látist og slasast, þar sem þau þorp og bæir sem urðu verst úti eru í ógreiðfæru fjalllendi.
Rauði hálfmáninn í Marokkó, sem hefur 8000 sjálfboðaliða, brást umsvifalaust við skjálftanum og er að hjálpa til við að meta aðstæður, samhæfa björgunaraðgerðir og veita þolendum skjálftans aðstoð í samvinnu við yfirvöld og aðra viðbragðsaðila.
Alþjóðasamband Rauða krossins, þar á meðal Rauði krossinn á Íslandi, votta aðstandendum þeirra sem hafa týnt lífi í þessum hörmungum dýpstu samúð og óskar þeim sem hafa slasast skjóts bata.
Það sem skiptir höfuðmáli núna er að bjarga lífum með öflugum björgunaraðgerðum, ásamt því að hlúa að þolendum skjálftanna.
Ekkert landsfélag getur brugðist við slíkum hamförum eitt síns liðs. Alþjóðasamband Rauða krossins mun styðja við viðbrögðin vegna hamfaranna og hefur þegar sent rúmlega 150 milljónir króna til að styðja við björgunaraðgerðir, auk þess sem ýmis landsfélög hafa boðið fram aðstoð sína. Þetta neyðarviðbragð er maraþon, en ekki spretthlaup. Mikilvægt er að bregðast hratt við, en þolendur skjálftanna munu þurfa stuðning næstu vikur og mánuði.
Fréttir af starfinu
Fréttayfirlit
Greiðsluseðlar vegna sjúkraflutninga eingöngu rafrænir
Almennar fréttir 28. nóvember 2025Rauði krossinn hefur nú hætt að prenta út og senda greiðsluseðla til þeirra sem hafa þurft að nýta sér þjónustu sjúkrabíla. Seðlarnir eru þar með eingöngu rafrænir og verða sendir í heimabanka.
Jólamerkimiðar Rauða krossins komnir út
Almennar fréttir 27. nóvember 2025Verkefni Rauða krossins á Íslandi í heila öld eru þemað á fallegum myndum sem prýða jólamerkimiða félagsins í ár. Miðunum hefur þegar verið dreift inn á heimili á höfuðborgarsvæðinu og þá verður hægt að nálgast víða um landið á næstu dögum.
Rauði krossinn fjölgar fatakössum á höfuðborgarsvæðinu
Almennar fréttir 18. nóvember 2025Nýjum söfnunarkössum Rauða krossins fyrir fatnað og annan textíl hefur verið komið fyrir við fimm Bónusverslanir á höfuðborgarsvæðinu. Samtals eru kassarnir því á sjö stöðum á svæðinu og stefnt er á frekari útbreiðslu á næstu misserum.