Alþjóðaráð Rauða krossins (ICRC) fór í vikunni ásamt sýrlenska Rauða hálfmánanum í sendiferð til Sweida í suðurhluta Sýrlands með nauðsynleg hjálpargögn og til að meta þarfir íbúanna á svæðinu fyrir frekari aðstoð. Fjölmargt fólk frá Sweida og nágrenni býr á Íslandi.

„ICRC sendi fjölfaglegt teymi á vettvang til að skilja betur og bregðast frekar við brýnustu þörfum,“ segir Stephan Sakalian, yfirmaður sendinefndar ICRC í Sýrlandi. Sendiförin var farin í samvinnu við sýrlenska Rauða hálfmánann. „Starfsfólk hans og sjálfboðaliðar hafa unnið framúrskarandi starf við afar erfiðar aðstæður,“ segir Sakalian.

Fulltrúar sendinefndarinnar ræddu við fjölskyldur, samfélagsleiðtoga og heilbrigðisstarfsfólk til að greina á hverju þau þurfa mest á að halda.

Fjöldi særðra á sjúkrahúsum

Teymi ICRC heimsótti m.a. skrifstofur sýrlenska Rauða hálfmánans í Sweida sem og tvö sjúkrahús sem Rauði krossinn tekur þátt í að reka á svæðinu. Mikill fjöldi særðra hefur þurft að fá aðhlynningu á sjúkrahúsunum frá því að hrina ofbeldisverka braust út. Teymið heimsótti einnig fimm neyðarskýli þar sem hundruð almennra borgara sem flúið hafa undan ofbeldinu hafast við.

Teymi sýrlenska Rauða hálfmánans flutti m.a. hveiti inn á svæðið og dreifði birgðunum í bakarí. Einnig kom teymið með hreinlætis- og lækningavörur til sjúkrahúsanna tveggja. Að auki var matur, dýnur og teppi meðal neyðargagna.

Sameiginlegar aðgerðir sem þessar eru gríðarlega mikilvægar fyrir fólkið í Sweida sem hefur búið við ótryggt ástand og stöðuga hættu vikum saman. Aðgengi þeirra að grunninnviðum á borð við heilbrigðisþjónustu er takmarkaður vegna ofbeldisins og sömuleiðis aðgangur þeirra að mörkuðum með nauðsynjavörur.

Almennir borgarar njóti verndar

Frá því að ofbeldið jókst fyrir nokkrum vikum hefur Alþjóðaráð Rauða krossins stöðugt hvatt þá aðila sem að því standa til að vernda almenna borgara, varðveita mannlega reisn fólks og tryggja öruggan, viðvarandi og óhindraðan aðgang mannúðaraðstoðar.

Fyrir þúsundir fjölskyldna sem komast hvergi og neyðast til að búa við ofbeldið skiptir sendiferð teyma Alþjóðaráðsins og sýrlenska Rauða hálfmánans miklu. Ekki aðeins vegna þess að hjálpargögnum var dreift heldur vekur heimsóknin von og veitir létti eftir óbærilegar og stöðugar þjáningar síðustu vikur, segir Sakilian.

Mikil og brýn þörf er fyrir frekari mannúðaraðstoð í Sweida. Alþjóðaráð Rauða krossins mun leggja sig fram við að fá frekari aðgang að svæðinu sem og að styðja við neyðaraðgerðir sýrlenska Rauða hálfmánans. Það gerir Rauði krossinn á Íslandi líka. Félagið hefur stutt við neyðaraðgerðir alþjóðaráðsins í Sýrlandi í mörg ár og mun halda því áfram.

Um Alþjóðaráð Rauða krossins (ICRC):

Alþjóðaráð Rauða krossins er hlutlaust, óhlutdrægt og sjálfstætt og starfar eingöngu með mannúð að leiðarljósi í samræmi við Genfarsamningana frá 1949. Ráðið aðstoðar fólk um allan heim sem verður fyrir áhrifum af vopnuðum átökum og öðru ofbeldi og gerir það sem í þess valdi stendur til að vernda líf fólks og reisn og draga úr þjáningum, oft í samstarfi við landsfélög Rauða krossins og Rauða hálfmánans á viðkomandi svæðum.