Þúsund nýjum beddum, 730 teppum og tíu barnarúmum hefur verið komið fyrir í gámi sem er nú til taks ef opna þarf fjöldahjálparstöðvar og er liður í að auka viðbragðsgetu Rauða krossins. Auk þess er búnaður aðgengilegur hjá deildum Rauða krossins um allt land. „Fjöldahjálparstöðvar getur þurft að opna með litlum fyrirvara vegna óveðurs, ófærðar eða náttúruhamfara,“ segir Atli Örn Gunnarsson, umsjónarmaður neyðarvarnarbúnaðar hjá Rauða krossinum. „Þess vegna skiptir miklu máli að búnaður eins og beddar og teppi séu ávallt til reiðu og á vísum stað.“

Búnaðarhópur Rauða krossins, sem Atli er í ásamt tveimur sjálfboðaliðum, þeim Liv Sjömoen og Sigurði G. Bjarnasyni, gekk frá nýja búnaðinum í gáminn nýverið. Hópurinn hefur það hlutverk að passa upp á að búnaður félagsins sé í góðu ásigkomulagi, að nóg sé til af honum og að hann sé aðgengur. Þá sér hópurinn einnig um að koma búnaðinum upp í fjöldahjálparstöðvum þegar þær eru opnaðar á suðvesturhorni landsins. Vel gekk að koma búnaðinum fyrir í gámnum enda vösk sveit að verki.

Í stoðhlutverki við stjórnvöld

Rauði krossinn á Íslandi gegnir stoðhlutverki við stjórnvöld í almannavörnum. Hlutverk félagsins felst meðal annars í opnun og starfrækslu fjöldahjálparstöðva, söfnunarsvæða aðstandenda og skráningarstöðva, úrvinnslu skráninga, sálfélagslegum stuðningi og aðkomu að rekstri þjónustumiðstöðva almannavarna.

Neyðarvarnir eru landsdekkandi verkefni og félaginu ber skylda til að sinna þeim um land allt. Landsskrifstofa Rauða krossins, sem er með aðsetur í Efstaleiti 9 í Reykjavík, fer með samræmingarhlutverk og sinnir þjónustu við deildir sem eru framkvæmdaraðilar.