Innanlandsstarf
Öllum ungmennum á Suðurnesjum boðið á skyndihjálparnámskeið
10. febrúar 2026
„Okkur hjá Rauða krossinum á Suðurnesjum er annt um að ungmennin í samfélaginu okkar öðlist aukið sjálfstraust og öryggi til að bregðast við óvæntum aðstæðum,“ segir Fanney Grétarsdóttir, deildarstjóri Rauða krossins á Suðurnesjum.
Rauði krossinn býður öllum ungmennum á aldrinum 12–16 ára sem búsett eru á Suðurnesjum á skyndihjálparnámskeiðið Bjargvættir - viðnámsþróttur. Námskeiðin eru 3-4 klukkustundir að lengd og verða haldin reglulega næstu vikur og mánuði. Þátttaka er ókeypis en krefst skráningar. Kennsla er í höndum reyndra leiðbeinenda í skyndihjálp.
„Okkur hjá Rauða krossinum á Suðurnesjum er annt um að ungmennin í samfélaginu okkar öðlist aukið sjálfstraust og öryggi til að bregðast við óvæntum aðstæðum,“ segir Fanney Grétarsdóttir, deildarstjóri Rauða krossins á Suðurnesjum. „Það mun leiða til sterkara og öruggara samfélags til framtíðar.“
Jarðhræringar á Reykjanesi á undanförnum árum hafa skekið innviði og haft í för með sér fólksflutninga. Vegna þessara áfalla hefur Rauði krossinn lagt sig fram við að hlúa að Suðurnesjabúum og auka viðnámsþrótt þeirra og hefur notið stuðnings fyrirtækisins Rio Tinto við það verkefni.
„Á Bjargvættanámskeiðinu okkar læra ungmennin skyndihjálp til að bregðast við í neyð en sú færni valdeflir fólk einnig á öðrum sviðum,“ segir Fanney. Námskeiðin eru sérstaklega útfærð með ungmenni á Suðurnesjum í huga. „Á námskeiðinu fá þau því líka verkfæri til að takast á við stærri atburði og auka viðnámsþrótt.“
Námskeiðin verða haldin í húsnæði Rauða krossins á Suðurnesjum að Smiðjuvöllum 9, Reykjanesbæ.
Hægt er að skrá sig á námskeiðin á heimasíðu Rauða krossins, raudikrossinn.is.
Fréttir af starfinu
Fréttayfirlit
Rauði krossinn boðar til aðalfundar og óskar eftir framboðum
Almennar fréttir 06. febrúar 2026Rauði krossinn á Íslandi boðar til aðalfundar laugardaginn 9. maí 2026 nk. Fundurinn verður haldinn í Háteigi, á Grand Hótel, Sigtúni 28 í Reykjavík.
„Neyðarástandið er hvergi nærri á enda“
Alþjóðastarf 26. janúar 2026„Meirihluti fólksins á Gaza býr enn við skelfilegar aðstæður,“ segir Gísli Rafn Ólafsson, framkvæmdastjóri Rauða krossins á Íslandi. „Byggingar eru enn rústir einar. Fjölskyldur syrgja enn ástvini. Margt af því sem þær þekktu áður er horfið. Hreyfing Rauða krossins og Rauða hálfmánans er staðráðin í að halda aðstoð sinni áfram.“
Aldrei fleiri samtöl vegna sjálfsvígshugsana
Innanlandsstarf 22. janúar 2026„Þrátt fyrir að hafa reglulega yfir árið tekið saman tölur um fjölda sjálfsvígssamtala sem berast 1717, og vera meðvituð um að samtölin hafa verið að þyngjast og verða alvarlegri, þá er okkur brugðið yfir heildarsamantekt ársins,“ segir Elfa Dögg S. Leifsdóttir, sálfræðingur og teymisstjóri heilbrigðisverkefna hjá Rauða krossinum.