Almennar fréttir
Alþjóðlegur dagur sjálfboðaliða
05. desember 2018
Alþjóðlegur dagur sjálfboðaliða er í dag, 5. desember. Rauði krossinn vill nota tækifærið og þakka þeim mikla fjölda sjálfboðaliða sem bjóða fram aðstoð sína og gera starf félagsins mögulegt.
Alþjóðlegur dagur sjálfboðaliða er í dag, 5. desember. Rauði krossinn vill nota tækifærið og þakka þeim mikla fjölda sjálfboðaliða sem bjóða fram aðstoð sína og gera starf félagsins mögulegt. Silja Bára Ómarsdóttir, stjórnarmaður Rauða krossins, skrifaði að þessu tilefni grein í Fréttablaðið sem birtist í dag til að koma áleiðis þökkum til allra sjálfboðaliða landsins fyrir hönd félagsins.
Sjálfboðaliðar eru á öllum aldri, fólk í námi, starfi og á eftirlaunaaldri. Íbúar í minni bæjarfélögum taka oft þátt í fleiri en einu sjálfboðaliðaverkefni en á höfuðborgarsvæðinu koma flestir að einu verkefni Rauða krossins. Það eru ólíkar ástæður fyrir því að fólk vinnur störf í sjálfboðavinnu, en íslenskar rannsóknir sýna að það er fyrst og fremst að viljinn til að leggja eitthvað af mörkum til samfélagsins, vinna að verðugu málefni og hjálpa þeim sem minna mega sín sem hvetur fólk að bjóða krafta sína í sjálfboðin störf.
Hjá Rauða krossinum starfa rúmlega þrjú þúsund sjálfboðaliðar við um fjögur þúsund stöðugildi í mörgum mismunandi verkefnum. Eins og fram kom í grein Silju Báru eru verkefnin mörg og mismunandi. Sum eru vel þekkt, eins og Frú Ragnheiður og Konukot. Önnur eru minna þekkt en engu minna mikilvæg eins og aðstoð við umsækjendur um alþjóðlega vernd, að kenna nýjum íbúum landsins íslensku, kvennadeildir prjóna fyrir ungabörn, margir sem flokka og selja föt sem annars færu í ruslið og sérþjálfaðir heimsóknarvinir sem sporna gegn félagslegri einangrun. Öll taka verkefnin mið af þörfum samfélagsins en þess utan hefur Rauði krossinn lögbundið hlutverk í neyðarvörnum og útvegar sjálfboðaliða til að veita fjöldahjálp og félagslega aðstoð í kjölfar neyðarástands. Án allra þeirra sem leggja sitt af mörkum til samfélagsins í gegnum verkefni Rauða krossins á Íslandi væri íslenskt samfélag veikara og fátækara. Rauði krossinn á Íslandi vill hvetja alla landsmenn til að líta í kringum sig í dag og þakka þeim sem þetta gera.
Fréttir af starfinu
Fréttayfirlit
Stærstu sveitarfélögin við Eyjafjörð semja við Rauða krossinn
Innanlandsstarf 27. maí 2025Fjallabyggð hefur bæst í hóp þeirra sveitarfélaga er samið hafa við Eyjafjarðardeild Rauða krossins um söfnun, flokkun og sölu á fatnaði og öðrum textíl á svæðinu. „Stór áfangi,“ segir Ingibjörg Halldórsdóttir deildarstjóri.

Starfsmenn Alþjóðaráðs Rauða krossins drepnir á Gaza
Alþjóðastarf 25. maí 2025„Dauði Ibrahims og Ahmad, félaga okkar hjá Alþjóðaráði Rauða krossins, er hryggileg áminning um hversu grafalvarleg staða almennra borgara er,“ segir Gísli Rafn Ólafsson, framkvæmdastjóri Rauða krossins á Íslandi. „Á Gaza er enginn staður öruggur.“

Þrjú ráðuneyti styrkja Hjálparsíma Rauða krossins
Innanlandsstarf 23. maí 2025Heilbrigðisráðherra, félags- og húsnæðismálaráðherra og mennta- og barnamálaráðherra hafa undirritað samning við Rauða krossinn sem felur í sér 25 milljóna króna styrk til reksturs Hjálparsímans 1717. „Þetta er ótrúlega mikilvæg þjónusta,“ sagði Alma D. Möller heilbrigðisráðherra er skrifað var undir samninginn í höfuðstöðvum Rauða krossins á fimmtudag.