„Rauði krossinn hefur staðið með Íslendingum í 100 ár og það var einstakt að fá að taka þátt í að fagna þessum tímamótum,“ segir Snorri Eldjárn Snorrason, hönnunarstjóri og einn stofnenda Strik Studio sem bjó til auglýsingu um aldarafmæli Rauða krossins á síðasta ári sem hefur nú verið tilnefnd til verðlauna á hinni virtu, evrópsku hönnunarhátíð, ADC’E. Auglýsingin er tilnefnd í flokki hönnunar kvikrar grafíkur (e. Design motion graphics) og til gamans má geta þess að keppt er við ekki minni fyrirtæki en Microsoft.

Auglýsingin sem Strik gerði er falleg teiknimynd þar sem farið er yfir helstu verkefni Rauða krossins á Íslandi allt frá stofnun árið 1924. Snorri segir það hafa verið forréttindi að vinna fyrir samtök sem hafi lagt svo mikið af mörkum til samfélagsins og fá tækifæri til að skapa auglýsingu sem skipti raunverulega miklu máli.

„Saga Rauða krossins er löng og litrík,“ segir Snorri um hönnunarferlið. „Við lögðum mikla vinnu í að fanga rétta tilfinningu í auglýsingunni. Sögufrásögn, teiknistíll og tónlist spila þar saman og mynda eina heild sem endurspeglar anda samtakanna.“

ADC’E er ein stærsta hönnunarhátíð Evrópu þar sem bestu verkefni álfunnar í grafískri hönnun og auglýsingum keppa um viðurkenningu. „Það er virkilega þýðingarmikið fyrir okkur sem unga hönnunarstofu að vera tilnefnd á slíku sviði – og sérstaklega með verkefni eins og þetta,“ segir Snorri.

Strik Studio sérhæfir sig í mótun vörumerkja og sköpun ásýndar ásamt víðtækri ráðgjöf á sviði samskipta. Fólkið á bak við stofuna eru auk Snorra, Viktor Weisshappel Vilhjálmsson, Jakob Hermannsson og Auður Albertsdóttir. Strik Studio starfar m.a. á sviði mörkunar, myndskreytinga, hreyfimyndagerðar og þrívíddarhönnunar og býður einnig upp á samskiptaráðgjöf, greiningar og textaskrif.