Þrír vinir úr Setbergsskóla í Hafnarfirði gerðu mikla lukku fyrir utan verslun Iceland í Staðarberginu í Hafnarfirði nýverið er þau opnuðu þar lítið bakarí til styrktar verkefnum Rauða krossins. Og úrvalið var heilmikið.

„Við vorum að selja pönnukökur, límonaði, Oreo-kex, trallakökur og kókoskúlur,“ segir Andrea Klara Stefánsdóttir, níu ára. „Líka sleikjóa,“ bætir Íris Eva Eldon Jónsdóttir, einnig 9 ára, við. „Mamma bakaði pönnukökurnar og gerði límonaðið en ég bakaði trallakökurnar og kókoskúlurnar,“ segir Rúrik Heiðar Long, 7 ára, alveg að verða 8.

Þau segja eiginlega alla sem áttu leið hjá hafa annaðhvort viljað kaupa eitthvað af þeim eða einfaldlega gefa pening til söfnunarinnar. „Ein kona gaf okkur stafla af klinki,“ segir Íris.

Spurð hvað hafi verið vinsælast, svara þau einum rómi: „Límonaðið“. Kókoskúlurnar hafi fylgt þar á eftir.

„Við viljum hjálpa öðrum,“ svarar Andrea, spurð um ástæður þess að þau ákváðu að safna pening fyrir Rauða krossinn. „Já, við viljum til dæmis hjálpa þeim sem eru heimilislausir,“ bætir Rúrik við.

„Við erum saman í hljómsveit og erum bestu vinir,“ segir Andrea um vináttu þeirra þriggja. „Við gerum eiginlega alltaf allt saman.“

Hljómsveitin heitir RÍA, en nafnið er samsett úr fyrsta stafnum í nöfnum þeirra allra. Þær Andrea og Íris spila á gítar og Rúrik á trommur. Þau segjast stefna að því að halda tónleika til styrktar Rauða krossinum í framtíðinni en fyrst þurfi þau að æfa sig meira.

Með sölunni úr litla bakaríinu söfnuðu þau vinirnir 14.873 krónum sem munu fara til mannúðarverkefna Rauða krossins.

Rauði krossinn þakkar þeim Andreu, Írisi og Rúrik kærlega fyrir að leggja mannúðinni lið með þessum hætti og hvetur aðra til að feta í þeirra fótspor.