„Þetta eru þung tíðindi og við þurfum nú að sjá á eftir framúrskarandi starfsfólki sem sinnt hefur þessum mikilvægu verkefnum af einstakri alúð,“ segir Gísli Rafn Ólafsson, framkvæmdastjóri Rauða krossins á Íslandi.

Frá því að Vinnumálastofnun tilkynnti Rauða krossinum um ákvörðun sína hafa samtöl átt sér stað við forsvarsmenn hennar og stjórnvalda. „Okkur er annt um að fólkið sem hefur nýtt sér þjónustuna fái hana áfram er hún færist úr höndum okkar sjálfboðaliða og starfsfólks til hins opinbera,“ segir Gísli.

Félagslegur stuðningur Rauða krossins fyrir fólk á flótta:

Markmið samningsins milli Rauða krossins og Vinnumálastofnunar var að tryggja vandaðan félagslegan stuðning fyrir umsækjendur um alþjóðlega vernd á meðan þeir bíða niðurstöðu eða flutnings úr landi. Með félagslegum stuðningi er m.a. átt við félagsstarf, virkniúrræði og sálfélagslegan stuðning.

Áherslur Rauða krossins í verkefnum fyrir fólk á flótta eru að draga úr jaðarsetningu og auka virkni, bæta andlega heilsu og vinna að inngildingu í íslenskt samfélag. Hefur félagið stutt við flóttafólk með þessum hætti frá árinu 2016 samkvæmt samningum við stjórnvöld. Félagsstarf hefur verið í boði bæði fyrir umsækjendur um alþjóðlega vernd og þau sem komin eru með vernd.

Sjálfboðaliðar með stuðningi starfsfólks Rauða krossins setja félagslega viðburði á dagskrá þar sem umsækjendur um vernd eru hýstir hverju sinni. Hafa þessir viðburðir skipt tugum í hverjum mánuði. Í fyrra komu 156 sjálfboðaliðar að skipulagningu og framkvæmd félagsstarfsins. Fjöldi viðburða á árinu 2024 voru 1.433 eða að meðaltali 119 á mánuði. Skráðar komur á alla viðburði voru 18.721 talsins.

Viðburðir félagsstarfsins hafa verið fjölbreyttir og eiga allir sameiginlegt að bjóða vettvang fyrir virkni og vinaleg samskipti í öruggu rými. Þar má nefna vikulegt opið hús, fjölskylduhóp, karla- og kvennahópa og ungmennahóp ásamt hópi fyrir flóttafólk undir hinsegin regnboganum. Einnig hafa verið í boði ýmsir íþróttaviðburðir s.s. fótbolti, blak, jóga og dans; listaviðburðir í bæði myndlist og leiklist ásamt mikilli tungumálaþjálfun á bæði íslensku og ensku á dagskrá.

Fjölskyldusameiningar:

Félags- og vinnumarkaðsráðuneytið, nú félags- og húsnæðismálaráðuneytið, gerði á síðasta ári samning við Rauða krossinn um ráðgjafarþjónustu við flóttafólk vegna fjölskyldusameininga. Samningurinn var til hálfs árs og rennur út í júní á þessu ári. Félagið hafði áður sinnt þjónustunni án samnings um árabil.

Í fyrra veitti Rauði krossinn um 250 viðtöl vegna fjölskyldusameininga.