Gísli Rafn gengur til liðs við Rauða krossinn með tæplega þriggja áratuga reynslu af þróunar- og hjálparstörfum á innlendum og erlendum vettvangi. Gísli Rafn býr yfir mikilli reynslu af stjórnunarstörfum, stafrænum umbreytingum og stefnumótun bæði innan alþjóðasamtaka og opinberra aðila. Hann þjónaði einnig sem þingmaður á undanförnu kjörtímabili, þar sem hann sat í utanríkismálanefnd og þróunarsamvinnunefnd fyrir hönd Pírata. Gísli Rafn er með meistarapróf í þróunarfræðum frá Háskóla Íslands.

Gísli Rafn var um langt skeið yfirmaður neyðarmála hjá NetHope, regnhlífasamtökum 60 stærstu hjálparsamtaka í heimi þar sem hann kom að viðbragðsstjórnun vegna fjölmargra umfangsmikilla náttúruhamfaravíða um heim. Gísli Rafn var einnig hluti af alþjóðlegu útkallsteymi sérfræðinga hjá Sameinuðu þjóðunum, UNDAC, sem kallað er út þegar stórar hamfarir dynja yfir og nauðsynlegt er að virkja viðbragð alþjóðasamfélagsins. Auk þess var Gísli Rafn stjórnandi Íslensku Alþjóðabjörgunarsveitarinnar þegar hún fór til Haiti árið 2010 í kjölfar mannskæðs jarðskjálfta þar í landi.

"Rauði krossinn á Íslandi gegnir lykilhlutverki í að styðja við þá sem þurfa mest á aðstoð að halda, bæði innanlands og utan. Ég hlakka til að vinna með þeim öfluga hópi starfsmanna og sjálfboðaliða sem starfa hjá Rauða krossinum við að efla starfsemi félagsins og tryggja að við verðum áfram til staðar fyrir þá sem þurfa á okkur að halda." segir Gísli Rafn um ráðningu sína.

“Með ráðningu Gísla Rafns hefur Rauði krossinn fengið reynslumikinn og framsækinn leiðtoga sem mun vinna að því að styrkja og efla starfsemi félagsins, bæði innanlands og á alþjóðavettvangi.” segir Silja Bára Ómarsdóttir formaður Rauða krossins á Íslandi.