Almennar fréttir

Á næstu mánuðum mun Rauði krossinn á Íslandi fá afhenta 25 nýja sjúkrabíla. Um er að ræða sautján Van-sjúkrabíla eins og þegar þekkjast á götum landsins og átta svokallaða Box-bíla, þ.e. sjúkrabíla með kassa. Er þetta í fyrsta sinn sem Box-bílar eru keyptir hingað til lands í kjölfar útboðs.

Samið hefur verið við Fastus ehf. um kaupin á bílunum 25 með möguleika á að kaupa aðra 25 til viðbótar. Fjársýsla ríkisins hafði umsjón með útboðinu, sem auglýst var á öllu evrópska efnahagssvæðinu. Bifreiðarnar verða smíðaðar hjá BAUS AT í Póllandi sem hefur smíðað sjúkrabíla fyrir Rauða krossinn undanfarin ár. 

Rauði krossinn heldur utan um sjúkrabílaflota landsins samkvæmt samningi við Sjúkratryggingar Íslands. Í því felst að félagið útvegar og annast innkaup á sjúkrabílum auk þess að reka þá sem og tækjabúnað til sjúkraflutninga.

„Með tilkomu Box-bíla er verið að mæta þörf fyrir betra rými og vinnuaðstöðu inni í sjúkrarýminu,“ segir Marinó Már Marinósson, verkefnastjóri sjúkraflutninga hjá Rauða krossinum. „Nú verður hægt að sitja báðum megin við sjúkling inni í sjúkrarýminu þannig að aðgengi að sjúklingi verður mun betra meðan á flutningi stendur, ólíkt hefðbundnum sjúkrabílum þar sem rýmið er takmarkaðra.“ 

Kassarnir á Box-bílunum eru hannaðir sérstaklega fyrir sjúkraflutninga og skipulag á skápum og hillum í þeim er að sögn Marinós betra og stærra. „Box-bílarnir eru byggðir fyrir mikla notkun og taldir endingarbetri,“ segir Marinó. Boxin séu sett saman í einingum og því eigi að vera auðveldara að skipta út eða gera við einstaka hluta, eins og skápa og rafkerfi, án þess að hafa áhrif á aðra hluti í bílnum. „Ég tel þetta mikla framför.“

Gert er ráð fyrir að nýju bílarnir verði staðsettir á þeim stöðum á landinu þar sem álagið er mest, til dæmis á stóru þéttbýlisstöðunum.

Í dag á Rauði krossinn og rekur 94 sjúkrabíla, þar af eru 80 í notkun en fjórtán hafðir til vara. Meðalaldur flotans er nú sex ár.

Stefnt er að því að fyrstu bílarnir komi til landsins eftir um 18 mánuði.