Almennar fréttir
Skyndihjálparleiðbeinandi sómalska Rauða hálfmánans lést við störf
14. febrúar 2023
Sjálfboðaliðinn var við störf á Lasanod-svæðinu og varð fyrir skoti þegar vopnuð átök blossuðu upp.

Á laugardag, 11. febrúar, lést sómalskur skyndihjálparleiðbeinandi á vegum sómalska Rauða hálfmánans við sjálfboðastörf eftir að hafa orðið fyrir skoti. Vegna langvinnra þurrka er ástandið í austurhluta Afríku óstöðugt og vopnuð átök hafa átt sér stað á Lasanod-svæðinu í Sómalíu, þar sem sjálfboðaliðinn var að aðstoða fólk.
Framkvæmdastjóri sómalska Rauða hálfmánans, Ahmed Abdi Bakal, sem hefur meðal annars unnið náið með starfsfólki Rauða krossins á Íslandi vegna verkefna félagsins í Sómalíu, sagði í yfirlýsingu vegna málsins:
„Við erum harmi slegin og orð koma að engu gagni við að tjá sorg okkar á þessari stundu. Ég sendi dýpstu og innilegustu samúðarkveðjur til allra í sómalskra Rauða hálfmánanum, sérstaklega þeirra sem sinna heilbrigðismálum, sjálfboðaliða í Lasanod-deildinni og fjölskyldu eins duglegasta sjálfboðaliðans okkar, Abdisalam Musa Saed. Megi Allah veita honum frið í paradís.“
Starfsfólk sómalska Rauða hálfmánans er að mæta mjög erfiðri mannúðarkrísu þar í landi vegna langvinnra þurrka sem hafa skapað alvarlegt fæðuóöryggi og það hefur leitt til ýmissa alvarlegra félagslegra vandamála og grafið undan öryggi.
Rauði krossinn á Íslandi hélt nýverið neyðarsöfnun vegna þessarar stöðu sem varð til þess að hægt var að senda 28 milljónir króna til Sómalíu og félagið hefur beitt sér í ýmsum verkefnum til að koma til móts við erfiðleikana þar í landi. Rauði krossinn á Íslandi sendir kollegum sínum í Sómalíu innilegar samúðarkveðjur.
Fréttir af starfinu
Fréttayfirlit
Fjármögnun neyslurýma áskorun um alla Evrópu
Innanlandsstarf 25. júní 2025Þrátt fyrir að neyslurými fyrir vímuefni hafi fyllilega sannað gildi sitt gagnvart bæði einstaklingum og samfélögum glíma þau við sama vandamálið, hvort sem þau eru í Barcelona eða Borgartúni. Starfsfólk skaðaminnkunarverkefna Rauða krossins sótti upplýsandi ráðstefnu í Strassborg.

Nýtt forvarnarátak: Öryggi barna í sundi
Innanlandsstarf 23. júní 2025„Drukknun er algengari en flestir halda og stundum er því talað um hinn þögla faraldur,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. Félagið hefur hleypt af stokkunum fræðslu- og forvarnarátaki um öryggi barna í sundi í samvinnu við Reykjavíkurborg og Samtök forstöðumanna sundstaða á Íslandi.

Sigríður tekur við formennsku af Silju Báru
Almennar fréttir 19. júní 2025„Ég tek við starfi formanns með mikilli auðmýkt, tilhlökkun og virðingu fyrir öllum þeim sem starfa fyrir Rauða krossinn, bæði sjálfboðaliðum og starfsfólki,“ segir Sigríður Stefánsdóttir, nýr formaður Rauða krossins á Íslandi.