Þrír vinir og bekkjarbræður úr Sjálandsskóla í Garðabæ mættu galvaskir á skrifstofu Rauða krossins nýverið með appelsínugula fötu hálffulla af peningaseðlum og klinki. Þarna var um að ræða fé sem þeir Jóhann Atli Einarsson, Jan Kári Kröyer Jóhannsson og Björn Dagur Óskarsson, allir níu ára, höfðu safnað fyrir Rauða krossinn. Nokkrum vikum áður hafði þessi sama fata verið notuð til að safna í sælgæti á hrekkjavökunni. En nú fannst vinunum kominn tími til að leyfa öðrum að njóta þess sem í fötuna var safnað.

Fénu höfðu þeir safnað með því að ganga í hús í hverfinu sínu. Strákarnir söfnuðu með þeim hætti 10.272 krónum meðal góðra granna sinna og sú upphæð var skilmerkilega afhent Rauða krossinum til ráðstöfunar.

Vinunum er sérstaklega umhugað um að söfnunarféð nýtist börnum sem líði illa, „börnum sem þurfa aðstoð,“ sögðu þeir alvörugefnir. „Eða bara til þeirra sem þurfa mesta hjálp.“

Rauði krossinn þakkar þeim Jóhanni Atla, Jani Kára og Birni Degi hjartanlega fyrir stuðninginn og mun sjá til þess að söfnunarféð nýtist til góðra verkefna félagsins.