Rauði krossinn á Íslandi fékk á síðasta ári veglegan styrk frá Rio Tinto til að styðja við Grindvíkinga með margskonar félagslegum verkefnum og til að efla viðnámsþrótt fólks á Suðurnesjum öllum. Vegna styrksins hefur Rauði krossinn getað veitt fólki frá Grindavík fjölbreyttan stuðning. Sem dæmi hefur börnum og ungmennum boðist að fara á sjálfstyrkingarnámskeið, í sumardvöl, að sækja félagsstarf og útilífsnámskeið. Þá hafa foreldrar og börn fengið fræðslu um áföll og eldri borgarar og viðkvæmir hópar farið í sumardvöl, sótt vikulegar samverustundir og fengið fræðslu um stuðning, áföll og vinaverkefni Rauða krossins.

Styrkur Rio Tinto hefur einnig verið og verður áfram nýttur til verkefna sem miða að því að efla seiglu fólks og búa íbúa á öllum Suðurnesjum undir neyðarástand. Þjálfun sjálfboðaliða Rauða krossins á Suðurnesjum er enn fremur mikilvægur þáttur í verkefninu og hafa þeir m.a. fengið fræðslu um rekstur fjöldahjálparstöðva, skráningu þolenda í rýmingum og í að veita sálrænan stuðning og skyndihjálp. 

Viðnámsþróttur fólks á Suðurnesjum verður í brennidepli hjá Rauða krossinum á næstunni í tengslum við verkefnið 3dagar.is. Markmiðið er að undirbúa fólk fyrir neyðarástand svo það geti verið sjálfbjarga á heimilum sínum í þrjá daga. Mun styrkur Rio Tinto nýtast vel til þessa verkefnis, sem felur m.a. í sér fræðslu í formi myndbanda og námskeiða.

„Ef hamfarir dynja yfir getur breytt miklu að vera vel undirbúin,“ segir Jasmina Vajzovic Crnac sem fer fyrir verkefninu Viðnámsþróttur á Suðurnesjum. Hún rifjar upp að í febrúar á síðasta ári hafi hiti farið af öllum húsum á Reykjanesi vegna jarðhræringa við Svartsengi. Tímabundin ringulreið hafi skapast. „Sá atburður sýndi okkur svart á hvítu hversu mikilvægt er að vera undirbúin, sérstaklega á Íslandi – eyju úti í miðju Atlantshafi þar sem náttúruhamfarir eru þekktar.“