Hópastarf fyrir hinsegin fólk á flótta, sem Rauði krossinn á Íslandi stendur fyrir, hefur skilað góðum árangri fyrir þátttakendur samkvæmt niðurstöðu könnunar sem Alþjóðasamband Rauða krossins (IFRC) gerði á starfinu og birt var í sumar. Sambandið segir að vissulega séu nokkrar áskoranir fyrir hendi, m.a. sú að fólk utan höfuðborgarsvæðisins eigi erfitt með að taka þátt. „Starfið býr til rými þar sem umsækjendur um alþjóðlega vernd geta endurheimt hluta af sjálfsmynd sinni sem gæti að öðrum kosti fallið í skuggann af þeim erfiðleikum sem hljótast af því að sækja um vernd,“ segir m.a. í samantektarskýrslu IFRC.

Sambandið segir að hópastarfið leiki mikilvægt hlutverk í að styðja við hinsegin fólk sem flúið hefur til Íslands. Það sé gert með því að búa til öruggt rými þar sem þau geta tengst, deilt reynslu sinni og fengið sálrænan stuðning. „Starfið býr til einstakt umhverfi þar sem þátttakendur upplifa viðurkenningu, virði og valdeflast,“ segir enn fremur í skýrslu Alþjóðasambandsins.

Stutt við sjálfsmynd fólks

Að flýja heimaland sitt í leit að skjóli getur reynt verulega á. Ferlið sem fer í gang þegar sótt er um vernd í öðru landi býður þeirri hættu heim að fólk einbeiti sér að fáu öðru en því að vera manneskja á flótta. „Þetta getur þýtt að aðrir hlutar sjálfsmyndar þess, svo sem að vera hinsegin, falla í skuggann. Hópurinn hjálpar til við að draga úr þessu með því að fagna og styðja við heildstæða sjálfsmynd hvers og eins, að viðurkenna fólk fyrir að vera það sjálft en ekki aðeins líta á það sem umsækjendur um vernd,“ segir í niðurstöðukafla skýrslunnar.

Þátttakendur í hópnum lýsa starfinu ítrekað sem mikilvægasta félagsstarfi sínu í hverri viku. Segja þau hópinn bjóða upp á öruggt rými til að deila reynslu, þar á meðal af áföllum og mismunun, sem hjálpi til við að draga úr einangrun.

Vikulegir fundir

Hópurinn byggir í grunninn á tryggð og trúnaði við þá sem taka þátt í starfinu sem leitt er af sjálfboðaliðum Rauða krossins, sérþjálfuðum í málefnum hinsegin fólks á flótta. Vikulega er boðið upp á viðburði, jafningastuðning og ráðgjöf. Milli 7 og 12 einstaklingar hafa hingað til tekið þátt í hvert skipti. Flest er fólkið að bíða eftir niðurstöðu umsóknar um alþjóðlega vernd en einhverjir hafa þegar fengið vernd. Þá eru líka dæmi um að fólk sem ekki fékk vernd og hvarf til annarra landa vilji áfram tilheyra hópnum og leita þar stuðnings í gegnum netið.

Hópurinn gegnir að mati IFRC mikilvægu hlutverki í því að draga úr einangrun hinsegin fólks á meðan það bíður úrlausnar umsókna sinna um vernd hér á landi, og í að bæta andlega líðan þess. „Þátttakendur segja að andleg heilsa þeirra hafi batnað því þeim sé boðið inn í öruggt umhverfi þar sem komið er fram við það af virðingu.“

Áhugasöm um frekari upplýsingar um hópinn, t.d. þau sem vilja taka þátt, geta haft samband með því að senda póst á netfangið asylum@redcross.is

Viltu gerast sjálfboðaliði í hópnum? Þá getur þú sótt um hér á íslensku og hér á ensku.