Festival-stemning ríkti í höfuðstöðvum Rauða krossins í Víkurhvarfi nýverið er tugir fólks sem neyðst hefur til að flýja heimaland sitt Úkraínu komu saman til leiks og fræðslu. Fólk á öllum aldri, börn jafnt sem fullorðnir, tók þátt. Hátíðin stóð í tvo daga og gátu þátttakendur valið úr fjölda viðburða þar sem áhersla var lögð á stuðning og fræðslu ýmist í gegnum leik, listsköpun, fræðsluerindi og samræður.

Starfsfólk og sjálfboðaliðar Rauða krossins héldu utan um samkomuna sem markar lokakafla Wellbeing4U, átaksverkefnis Rauða krossins á Íslandi, sem er hluti af átaksverkefni víða í Evrópu, í sálfélagslegum stuðningi við Úkraínumenn. Verkefnið hefur staðið í þrjú ár og er styrkt af heilbrigðisáætlun Evrópusambandsins, EU4Health.

„Þetta voru góðar og gefandi samverustundir og mætingin var mjög góð,“ segir Yana Miz, verkefnisstjóri Wellbeing4U hjá Rauða krossinum, um hátíðina í Víkurhvarfinu. Um var að ræða nokkurs konar uppskeruhátíð verkefnisins og tóku um 60 manns þátt í mörgum mismunandi viðburðum. Að sögn Yönu hefur verkefnið reynst Úkraínumönnum á Íslandi vel til að tengjast, miðla af reynslu og styðja hver annan í nýju landi.

Markmið Wellbeing4U er að búa til vettvang fyrir sálfélagslega fræðslu og jafningastuðning fyrir flóttafólk. Þannig hafi meira en tíu sjálfboðaliðar frá Úkraínu og Litháen tekið þátt og boðið upp á margvíslega fræðslu í þeim tilgangi að auka seiglu og andlega vellíðan.

Þátttakendur á hátíðinni í Víkurhvarfinu hafa sumir búið í nokkur ár á Íslandi en aðrir aðeins í fáa mánuði. „Við vildum með hátíðinni búa til vettvang til að halda áfram að efla tengsl milli Úkraínumanna á Íslandi sem aftur mun hjálpa þeim að taka virkan þátt í íslensku samfélagi,“ segir Yana.

Átaksverkefninu Wellbeing4U lýkur brátt en Yana segir von sína og annarra sem komið hafa að verkefninu þá að inntak þess haldi flugi og þau tengsl fólksins sem skapast hafa haldi áfram að styrkjast. Það auki líkur allra á því að ná að blómstra.